LERE Aposta Mos Jerasaun Foun Iha Prosesu Dialogu Nia Laran
Naunil Media, Beibeik ona iha komisiu kiik no boot sira, Kandidatu Prezidente da Republika Tenente Jeneral reformadu, Lere Anan Timur, aposta liu iha DIALOGU hanesan solusaun ba impase politika prolongada ne’ebe Timor-Leste ohin loron hasoru.
Lere Anan Timur, hakarak iha dialogu ida permanenti, katak beibeik, no inkluzivu, katak ho ema hotu, inklui lideransa ho lideransa, lideransa ho povo, no povo ho povo, feto no mane.
Ba Lere, tinan lima oin mai, sai hanesan tinan lima ida kritiku tebes, importante tebes ba futuru nasaun nian atu tranzisiona ba estabilidade politika ida forti hodi garante unidade nasional no desenvolvimentu.
Maibe, nia mos ‘konxiente’ katak, nee laos fasil, nia sei hasoru dezafius barak. Ida nee analitikamente rasional tan wainhira atu hakotu siklu visiadu ida neebe kuaze kleur ona iha sosiedade ida, presiza ita hotu nia tulun, ita hotu nia boa fe, ita hotu nia intensaun diak.
Nunee duni, nia konvida ita hotu atu bele apoia inisiativa ida nee, liuliu jovem sira neebe mak sei lori korenti estafeta Estadu nian ba oin.
Kandidatu ho numeru sorteiu 8, nia esperansa katak iha tinan lima oin mai, Timor-Leste hanesan Estadu, hanesan nasaun tenki ultrapasa hotu ona krize politika sira neebe mak duranti nee ita hasoru. Tenki ultrapasa hotu ona odiu no vingansa politika estrutural sira neebe durante nee venena funsionamentu estadu demokratiku ida nee.
Maibe, karik jerasaun tuan sira mak lakohi halo ida nee, LERE dehan katak, nia sei dudu jerasaun foun sira. Nia fiar katak jerasaun foun sira ohin loron nia intelektualidade boot tebes. Iha F-FDTL rasik, Lere asegura ona tranzisaun ida nee. Nia fiar katak jerasaun foun sira wainhira iha orientasaun ida diak, wainhira hetan apoiu neebe masimu, sira bele lori nasaun nee ba oin. Maibe, ba LERE, jerasaun foun laos iha deit fiziku maibe iha mos ideas. Fiziku bele jovem maibe hanoin mos bele tuan, fiziku bele tuan, maibe hanoin mos bele foun.
Nia husu ba jerasaun tuan sira hotu atu bele halo reflesaun ida produnda katak, forma politika ida neebe bazeia ba odiu no vingansa politika sira hotu tenke para ona, tenke para agora, ita labele hein tan. Nunee bele duni fasilita tranzisaun ida diak ba jerasaun tuir mai wainhira sira hotu laiha ona forsa.
Ba Lere, sei sai PR ba periodu ida de’it. Periodu tuir mai, nia iha ona kandidatu jovem ida, jerasaun patriota ida neebe nia hakarak apoia atu sai PR. LAT
