Falur: Membru F-FDTL Orsida Kalan Labele Toba Iha Ró Camanasa Laran
Naunil Media (Díli), Xefí Estadu Maiór General das Falintil Forsa Defeza Timor-Leste (F-FDTL) Tenente General Falur Rate Laek, Husu ba membru F-FDTL hahú orsida kalan labele toba iha Ró ahi Camanasa laran tanba tauk mout.
Tenente General Falur Rate Laek hato’o lia hirak ne’e ba jornalista sira hafoin enkontru semanal ho Prezidente Repúblika (PR) Francisco Guterres “Lú Olo” iha Palásiu Prezidensiál Nicolau Lobato Bairru Pite, kuarta (30/03).
“Naval nia problema ida ne’e agora tolu ida uluk doasaun husi Koreia nian paradu tiha Camanasa ne’e paradu hela iha ponte kais Díli, no ha’u halo ona medida prevensaun atu retira ekipamentu sira ne’ebé iha laran desmonta ona no medida imediatu mak apartir ohin sira rona ha’u ko’alia iha ne’e, Forsa sira orsida kalan labele ba toba iha laran ona, tanba ha’u tauk sira ba toba iha laran bele mout sira mate ha’u responsabiliza, tanba ne’e ha’u deklara iha ha’u senti katak ha’u nia forsa ne’ebé servisu iha Camanasa apartir orsida kalan lalika ba toba iha Ró ahi ida ne’e laran”, dehan Tenente General Falur Rate Laek.
Tenente General hatutan, Tanba antes ne’e nia rona husi Ministru esplika katak, sira halo ona kontaktu ho Koreia fó resposta ruma para fó solusaun ba Ró ne’e mas ema la fó to’o agora, tanba durante mai ba vizita Ró aat liu ona.
Falur Rate Laek hateten, Ró rua ne’ebé governu sosa husi China, dadaun ne’e para hela tanba antes ne’e nia vizita no tuir nia planu dada tiha ida ba Rampas Behau nune’e ponte monu karik bele salva tiha ida.
“Agora Ró rua seluk ne’ebé ita nia governu sosa husi China ne’e para hela iha ne’ebá, hodibainhira ha’u ba vizita ha’u nia planu ne’e atu dada tiha ida ba para iha Rampas Behau, ne’e para ponte ne’e monu karik rasta de’it ida ba tasi kidun ita salva ida, Mas horseik Ministru esklarese ba ha’u katak tender la’o ona, ha’u nia hanoin tender primeiru mak ba Rampas ne’e, maibé governu dehan ba hadia iha rai li’ur”, katak Falur Rate Laek
Nia mós hatutan, Progresu rehabilitasaun iha Aero Portu Baucau dadaun ne’e la’o hela no tempu badak sei halo inagurasaun ba uma apoiu logistika nian no mós ba lutu ne’ebé haleu Aero Portu ne’e rasik. *Jos
