Zaulino : Joven 44 % Iha Ensinu Superior Hili Preferensia Latuir Fakuldade
Naunil Media (Díli), Prezidente Alumi Parlamentu Foin-Sa’e Timor-Leste (APFTL), Zaulino Gomes da Silva hateten tuir dadus ne’ebé iha hatudu katak joven 44 % mak iha ensinu superior hili Preferensia Latuir sira nia fakuldade.
Prezidente APFTL Zaulino Gomes da Silva ba Jornalista sira hafoin remata enkontru ho Prezidente Repúblika PR José Manuel Ramos Horta iha palásiu Prezidensiál Nicolau Lobato Bairru Pite, Segunda (20/06).
“Rezultadu ida ne’e ohin ami informa ba Prezidente Republika fo kontinuidade para halo advokasia hodi tulun governu nia politika oinsa integra iha programa governu ninian, oinsa mak influensia OJE para bele liga ba asuntu ninian, tanba dadus mos hatudu katak, joven 44% joven sira iha ensinu superior hili la tuir sira nia preferensia eskola ne’ebe sira eskola ba, fakuldade sira ne’ebe sira hili ne’e la tuir sira nia hakarak,” dehan Prezidente APFTL
Zaulino hateten iha enkontru ne’e sira informa ba Prezidente Republika kona-ba estudu ne’ebé APFTL halo iha tinan kotuk liuliu joven sira nia preferensia, ba setor edukasaun, empregu, no partisipasaun siviku.
“Ida ne’e mak ami partilha ho Prezidente Republika kona-ba joven sira nia preferensia ba edukasaun, saida mak sira hakarak, sira hakara estudu karik prefere liu ba Fakuldade ka siensia ne’ebe sira prefere,” hateten Zaulino
Prezidente APFTL ne’e argumenta katak iha relatoriu estudante ka joven ninia preferensia ba Eskola Teniku Vokasional ne’e menus liu kompara ho Siensia Naturais ho Siensia Sosiais, sira prefere liu foti kursu Siensia Naturais duke foti Eskola Tekniku Vokasional, tanba sira seidauk hatene importansia husi Tekniku Vokasional, entaun realtoriu ne’e hatudu katak joven sira hili liu Siensia Naturais ho Sosiais duke Tekniku Vokasional ne’ebé governu nia politika transforma Ensinu sekundaria sira ba Tekniku vokasional.
Iha enkontru ne’e Prezidente Republika orienta kedas APFTL reuniaun teknikamente ho asesor na’in rua para haree kontinuidade oinsá atu mobiliza rekursu halo advokasia para apoiu PR nia politiku ida oinsá tau OJE 20% ba setor edukasaun, la’os koalia orsamentu 20% ne’e de’it, maibé oinsá halibur dadus para bele iha informasaun natoon para ajuda politika na’in sira, bele responsivu ba situasaun ne’ebé TL hasoru.*/Jos
