Governu Sei Transforma Ospitál Antiga Lahane Sai Fatin Tratamentu COVID-19
Naunil Media (Díli), Iha Palasiu Governu, Tersa (12/05) ne’e, Primeiru Ministru, Taur Matan Ruak hala’o reuniaun ho Ministru Obras Públika (MOP), Salvador Soares dos Reis Pires, hodi fó orientasaun ba MOP hodi servisu hamutuk ho Sentru Integradu Jestaun Krize (CIGC-Sigla Português) reabilita Ospitál Militar Antigu dr. António Carvalho Lahane ba fatin tratamentu pasiente COVID-19 bainhira Timor-Leste tama ba senáriu pior.
“Primeiru Ministru bolu hau mai atu haree reabilitasaun Ospitál Lahane ne’ebé Sentru Integradu Jestaun Krize propoin atu reabilita sai fatin tratamentu ba pasiente Surtu COVID-19”, informa MOP, Salvador Pires, ba jornalista sira hafoin enkontru ho Primeiru Ministru Taur Matan Ruak.
Ministru Salvadór relata, orsamentu jerál estadu 2019, MOP prevé ba obra reabilitasaun Ospitál Lahane ho montante rihun U$ 300-liu.
“Kompañia ida ho naran Barnabak maka agora halo hela prosesu estudu ne’ebé aprezenta ona ba governu hodi hasa’e kapasidade akomodasaun ba Ospitál Lahane nian, maibe kestaun mak ne’e oinsa ita bele halo planu longu prazu nian hodi bele responde emerjénsia, tamba ne’e inportante tebes hodi ajuda CIGC nia ekipa bele halo tratamentu ba pasiente Surtu COVID-19 nian”, tenik Nia.
Governante ne’e dehan, komunidade ne’ebe dadaun ne’e okupa hela Ospitál Lahane, tempu badak parte kompañia no governu sei haree kestaun impaktu sosiál sira no impaktu ambientál ne’e hodi fo tratamentu ho dignu. Uar
