COVID-19 : Klandestinamente Timor Oan 25 Tama Mai TL
Naunil Media (Díli), Liuhosi Sala Situasaun, Sentru Integradu Jestaun Krize (CIGC-Sigla Português), Porta Voz, dr. Rui Maria de Araújo, informa maske Governu planu atu loke fronteira terestre semana ida dala ida, hahu hosi loron 2 fulan Juñu tinan 2020 ne’e, maibé sidadaun Timor oan balun nafatin klandestinamente tama mai Timor (ilegál).
“Governu deside ona atu loke fronteira terrestre, semana ida dala ida, hau hosi loron Kuarta durante oras rua nia laran, hahu hosi 2 Juñu maibé sei nafatin iha sidadaun Timor oan ho klandestinamente hakat ba mai rai ketan Indonézia ho Timor-Leste”, Porta voz, dr. Rui Maria de Araújo, ba jornalista sira iha Centro de Convenções de Díli (CCD), Segunda (15/06).
Porta voz CIGC, dr Rui Maria, informa liu-tan “Hahu hosi semana ida ne’e nia laran, hosi loron 8 fulan Juñu to’o 15 de Juñu iha ema nain 25 mak hakat klandestinamente iha rai ketan”.
Nia relata, hosi ema nain 25 ne’e, nain 10 hosi Rejiaun Administrativa Espesiál Oe-Cusse Ambeno (AEOA) (Citrana-4 no Oesilo nain-6), nomos nain-14 hosi Bobonaru, Memo, Tunubibi hamutuk ema nain-8, Lolotoe nain-2, Batugade nain-4 inklui munisipiu Kovalima nain-1. Ema hirak ne’e dadaun iha hela kuarentena ka konfinamentu obrigatóriu. Dms/Flo
