Governu Rezeita FM, Lito Rambo: Dezenvolvimentu Hakdasak no Ekonómia Sai Fraku

Naunil Media (Díli), Relasiona aprovasaun Orsamentu Jerél Estadu (OJE) 2021, Sekretariu Konsellu Politika Nasionál Partidu Demokratiku (CPN-PD), Manuel de Carbalho ‘Lito Rambo’ hateten, governu rasik mak rezeita fundu minarai (FM), tanba ne’e Timor-Leste nian dezenvolvimentu hakdasak no ekonómia rai laran sai fraku.
Sekretariu Konsellu Politika Nasionál Partidu Demokratiku (CPN-PD), Manuel de Carbalho ‘Lito Rambo’ ba Naunil Media iha ninia rezidénsia, Pantai Kelapa, sábadu (30/04).
“Ha’u la ko’alia osan OJE ne’e iha ka la iha. Ha’u triste liu kuandu orsamentu ne’e governu hodi emosaun ho vontade ne’ebe bo’ot lori prigrma ba apresenta iha Parlamentu Nasionál hodi hato’o ba deputadu/a sira halo apresiasaun votasaun, vota afavor, vota kontra, vota abstensau, barak vota afavor tiha.

Depois Prezidente Repubika ho vontade di’ak promulga tiha fó sai tan iha Jornál da Republika, maibé governu dekreta fali la nesesaria atu foti fundu mina rai ita la depende ba ne’eba, depende ba saida, tanba ne’e oin loron dezenvolve hakdasak ekonomia fraku”, dehan sekretariu CPN-PD Manuel.

Sekretariu CPN-PD ne’e hatutan, maibé ninia estrainu mak ne’e bainhira OJE 2021 hetan tiha aprovasaun no Presidente Republika promulga depois ministru no governu ko’alia fali la nesesaria foti fundu minarai. Se la nesesaria foti fundu mina rai reseita husi ne’ebé mak atu uza hodi sustenta makina estadu ne’ebé ita la iha osan ne’ebé sufisiente atu sustentabliza estadu.

“Orsamentu sira seluk ne’ebé uluk la gastu ita ko’alia sira bele foti hodi uza, maibé ba dezenvolvimentu infraestitura no envestimentu sira seluk ne’e oinsa no foti husi ne’ebé ita la iha. Reseita domestiku minimu tebe-tebes ne’ebé ita la foti fundu minarai ne’e risku bo’ot liu”, Juventude rezistensia Lito Rambo haktuir.

“Governu lori de’it programa sira hanesan hatudu saude iha parlamentu, maibé pratika la iha ida ne’e mak impaktu, ekonomia Timor-Leste tendensia ne’e ba fundu mina rai ida ne’e mak sai problema”, nia akresenta.

Juventude rezistensia ne’e informa, solusaun ba problema sira ne’e husu ba líder bo’ot sira ne’ebé mak formal, informal no Kay Rala Xanana Gusmão, Taur Matan Rua, José Manuel Ramos Horta, Naimori no líder partidu politiku sira ne’ebé mak apela bei-beik agora ne’e hamutuk tan dala ida hodi kolektivamente ba sutru covid-19.

“Konserta oinsa atu dezenvolve ita-nia rai doben Timor-Leste oinsa bele normaliza fila fali ita nia ekonómia ida ne’e luta ida la’ós governu nian papel de’it. Maibé líder bo’ot sira hotu iha responsablidade moral, polítika”. Nia hato’o.

Nia afirma, “Ha’u hare’e ne’e katuas bo’ot sira fó kotuk ba malu, hanesan sira nian diverjensia aas liu tiha fali interese nasionál, povu no estadu nian problema tanba ekonomia ida ne’e mak problema ne’ebé hau la fó sala ba maun sira. Maibé, Ha’u triste tebes maun sira la buka malu to’o agora ida ne’e perigu tebe-tebes. Uluk ita hamutuk konsege manan luta naruk balu sakrifika an ba mate, inposivel manan maibé ikus ita manán funu”. Tenik nia. Ipe