SEKOmS-Konsellu Imprensa Diskute Aujénsia Konsilleru Ida Husi PN
Naunil Media (Díli), Tersa (01 fulan Agostu) ne’e Sekretáriu Estadu Komunikasaun Sosiál (SEKomS), 𝐄𝐱𝐩𝐞𝐝𝐢𝐭𝐨 𝐃𝐢𝐚𝐬 𝐗𝐢𝐦𝐞𝐧𝐞𝐬 hetan vizita husi Konsellu Imprensa Timor Leste (KITL) hodi diskute kona-ba aujénsia konsilleru ida ne’ebé nomeia husi Parlamentu Nasionál (PN).
Konsilleru iha Konsellu Imprensa Timor-Leste hamutuk na’in-lima, maibé na’in-ida maka Expedito Dias Ximenes assume fali kna’ar foun hanesan Sekretáriu Estadu Komunikasaun Sosiál.
Sekretáriu Estadu Komunikasaun Sosiál, 𝐄𝐱𝐩𝐞𝐝𝐢𝐭𝐨 𝐃𝐢𝐚𝐬 𝐗𝐢𝐦𝐞𝐧𝐞𝐬 bainhira simu tomada de posse hanesan membru governu konstitusionál da-sia, aprezenta ona karta rezignasaun ba Konsellu Imprensa, maibé tanba liu ona fulan ida, presiza Parlamentu Nasionál hili fali ema ida hodi ba okupa fatin ne’e hodi bele prienxe korum hanesan órgaun kolezial.
Sekretáriu Estadu ho Konsellu Imprensa rekoñese kestaun ne’e importante tebes tanba fó impaktu tebes ba desizaun sira liga ho ezekusaun orsamentu, iha ne’ebé konsilleru ema na’in-haat de’it labele hetan votu ímpar.
Iha sorumutu ne’e Konsilleru 𝐅𝐫𝐚𝐧𝐜𝐢𝐬𝐜𝐨 𝐒𝐢𝐦𝐨𝐞𝐬 𝐁𝐞𝐥𝐨 𝐝𝐚 𝐂𝐨𝐬𝐭𝐚 espera katak Sekretáriu Estadu bele ko’alia ho Parlamentu Nasionál atu nune’e bele aselera hili fali ema ida ba substitui fatin ne’ebé mamuk.
“Ami presiza tebes substituisaun ida para bele efetiva plenária konsellu imprensa nian. No mós bele hola desizaun ba orsamentu 2023 i ita atu tama ba 2024 nian,” Konsilleru Quito subliña.
Entretantu Sekretáriu Estadu Komunikasaun Sosiál, Expedito Dias Ximenes marka ona audénsia ho Prezidente Parlamentu Nasionál, Fernanda Lay hodi buka solusaun imediata ba substituisaun konsilleru konsellu imprensa.
Iha oportunidade, Diretór Ezekutivu, 𝐀𝐧𝐭ó𝐧𝐢𝐨 𝐃𝐢𝐚𝐬 no Diretor Relasaun Instituisional no Kooperasaun, 𝐀𝐥𝐭𝐢𝐧𝐨 𝐅𝐫𝐞𝐢𝐭𝐚𝐬 toka mós preokupasaun sira kona-ba estatutu funsionáriu sira iha konsellu imprensa nune’e mós informa ba Sekretáriu Estadu preparasaun sira ba eventu Dili Democracy Forum ne’ebé sei akontese iha fulan oin.
Sekretáriu Estadu ho Konsellu Imprensa toka mós asuntu kona-ba revizaun lei komunikasaun sosiál, estatutu konsellu imprensa no kódigu étika rasik ne’ebé iha artigu balun la refleta ona ho kontestu atuál.
Kona-ba revizaun hirak ne’ebé temi, Sekretáriu Estadu informa katak, nia parte prepara daudauk oinsá mak iha uluk draf, inklui revizaun mós ba estatutu 𝐀𝐣é𝐧𝐬𝐢𝐚 𝐍𝐨𝐭𝐢𝐬𝐢𝐨𝐳𝐚 𝐓𝐀𝐓𝐎𝐋𝐈.𝐈𝐏 no haree fila-fali kontratu konseisaun ho 𝐑𝐓𝐓𝐋.𝐄𝐏.
Iha prosesu hirak ne’e, Sekretáriu Estadu husu ba Konsellu Imprensa atu aprezenta mós draf kona-ba revizaun ba estatutu konsellu imprensa nian.
Sekretáriu Estadu mós subliña programa governu konstitusionál da-sia nian ne’ebé fó prioridade boot ba setór komunikasaun sosiál, iha ne’ebé presiza tebes servisu hamutuk ho parseiru sira hotu atu nune’e bele atinji metas. */Tri
