MJDAK Husu FABTL Tau Matan ba Boxista ho Prestasaun Diak
Naunil Media (Díli), Ministru Juventude Desportu Arte no Kultura (MJDAK), Nelyo Isaac Sarmento husu ba Federasaun Amateur Boxing Timor-Leste (FABTL) atu tau matan ba boxer ho prestasaun diak.
Iha enseramentu eventu nasional Boxing ho tema jeral “Boxe ba Desportu Popular no Progresu Sosial ” ne’ebe realiza hosi FABTL, iha Estadiu Munisipiu Dili ne’e Ministru Nelyo apela ba boxista
junior no senior sira atu kontinua treina hodi prepara an ba iha eventu internasional ne’ebe Timor-Leste sei partisipa ba.
“Atleta junior no senior tenke treinu nafatin, tamba eventu internasional balun sei realiza iha tempu besik nia laran, husi kampionatu nasional ne’e, Federasaun Boxing Timor-Leste tenke tau matan ba atleta sira ne’ebe mak iha prestasaun diak, atu nune’e ba kompete iha eventu internasional hodi hamorin Timor-Leste nia naran iha mundo internasional,” hatete Nelyo Isaac, Sabadu (5/8/2023).
Ministru mos promote tinan oin sei apoia FABTL hodi halo eventu nasional dala 3 iha tinan ida nia laran.
“Tinan oin sei realiza eventu nasional dala 3 iha tinan ida nia laran nomos kompetisaun ne’e bele realiza iha munisipiu to’o mai nasional, husi kompetisaun ne’e estrutura sira tenke hadia teknika atu nune’e bele mellora diak liu tan federasaun boxe Timor-Leste ne’e ba oin, atu nune’e labele hamosu dezentendementu ruma,” dehan Ministru.
Partisipa enseramentu eventu ne’e, Vise Prezidente CONTL atual deputadu PN, Mateus da Cruz, no Xefe Gabinete MJDAK, Egas Barros. */Tri
