MCI-PAMD Deskute Koordenasaun Jestaun Merkadu no Aktividade Komersial Kapital Díli
Naunil Media (Díli), Tersa (08/08) ne’e Ministru Komérsiu no Indústria (MCI), Nino Pereira halo enkontru kortezia ho Prezidente Autoridade Munisipiu Dili (PAMD) hodi diskute koordenasaun serbisu, kooperasaun ba asuntu jestaun merkadu no kontrolu atividade komersiál iha kapitál Díli.
Iha reuniaun kortezia ne’e Ministru MCI aprezenta Ministério do Comércio e Indústria nia prontidaun atu tulun Autoridade Munisipiu Dili solusiona problema Merkadu no faan-nain sira ne’ebé okupa espasu públiku.
Ministru mós aprezenta hanoin atu revitaliza Merkadu Taibesi no Manleu, no planu alargamentu merkadu rua refere hodi akumula faan-nain sira ne’ebé halo atividade faan iha luron.
Iha sikun seluk, Prezidente Autoridade Munisipiu Dili mós hatan ba preokupasaun faan-nain sira iha Largo Lecidere, katak Autoridade Munisipiu Dili la duni sai faan-nain sira iha fatin refere maibé husu atu iha kooperasaun hodi asigura ijíene iha fatin públiku no la bele halo fatin ne’e sai hela fatin.
Autoridade Munisipiu Dili mós kompriende katak faan-nain sira faan iha ne’eba tanba nesesidade no kestaun sustentabilidade ekonomia familia nian maibé kontinua husu atu iha kooperasaun hodi asigura ijíene iha fatin públiku refere no mós obrigadu atu fó kuidadu ba fasilidade públiku ne’ebé iha.
Prezidente Autoridade Munisipiu Dili afirma katak Munisipiu Dili atua tuir lema “MOS”. Katak Dili tenke Moos, Organizadu no Saudável, maibé prezisa ema hotu ne’ebé hela iha Sidade dili atu kontribui ba ida ne’e.
Prezidente Autoridade Munisipiu Dili mós apresia Ministério do Comércio e Indústria nia prontidaun no inisiativa atu reforsa koordenasaun serbisu ho Autoridade Munisipiu Dili ba atividade komersiál iha kapitál Dili.
Ministru MCI ho ekipa inisia reuniaun koordenasaun ho Autoridade Munisipiu Dili, hafoin halo vizita observatória ba merkadu Manleu no Taibesi, inklui inisia komunikasaun ho faan-nain sira iha Largo Lecidere semana kotuk.*/Cou
