Eleitu ba Xefe Suku Ritabou, Raimiro Koopera Servisu Saúde Kria Klínika Movél

Naunil Media (Maliana), Kandidatu foun ba xefe suku Ritabou, Maliana, Bobonaro ho númeru sorteiu 6, Raimiro Mau Buti, hateten eleitu ba xefe suku mak sei halo kooperasaun ho Servisu Saúde postu administrativu no Munisípiu atu kria programa klínika movél ba komunidade sira ne’ebe nia-hela fatin distansia dok hosi sentru saúde.    

“Hau eleitu karik, presiza urjente mak proposta ba Ministériu relevante, servisu hamutuk ho Ministériu saúde kria klínika movel hodi bele fasilita komunidade sira ne’ebé mak dok husi sentru saúde”, dehan kandidatura xefe suku Ritabou Raimiro, iha Sede Suku Ritabou, foin lalais ne’e.

Mau Buti, hatutan karik eleitu mak sei koopera ho juventude kreativu líder arte marsial sira iha suku Ritabou hodi kria paz ba kontribuisaun Dezenvolvimentu suku.

“Ita sei bolu joven sira ne’ebé mak remata estudu, joven kreativu sira no ba sira ne’ebé mak tama arte marsiais halo problema ita buka sira nia maun bo’ot hodi rezolve no kria aktividade desportu”, tenik kandidatura ne’e.

Kandidatura ne’e mós sei halo kooperasaun ho Guverno sentrál no Ajensia internasionál sira hodi halo dezenvolvimentu iha suku Ritabou

Raimiro Mau Buti  optimista katak sei eleitu nu’udar xefe suku Ritabou tanba hetan fiar husi lia-na’in, estudante no juventude intelektuál sira. Gyor