COVID-19 : Hafoin Livre Loron 50, TL Rejista Hikas Kazu Positivu Ida
Naunil Media (Díli), Koordenadór Jerál Komisaun Ezekutivu Saúde ba Surtu COVID-19, Narcisio Fernandes, hafoin livre durante loron lima nulu (50) husi Surtu COVID-19, iha Tersa (04/08) ne’e Timor-Leste (TL) rejista hikas kazu foun posivu ida.
“Kazu pozitivu ida, pasiente sexu mane ho idade 46, sidadaun Indonézia, husi Jawa Tengah. Durante nia viajen husi Indonézia ho Aviaun Citilink to’o Kupang” iha loron 22 fulan Jullu no kontinuasaun viajen mai Timor-Leste ho karreta marka avanza hamutuk ho ema nain 6 kompostu husi labarik 1, feto 1 no mane nain 4 inklui motorista”, Koordenadór Jerál Komisaun Ezekutivu Saúde ba Surtu COVID-19, Narcisio Fernandes, ba jornalista sira iha Palásiu das Sinzas, Kai-Koli, Tersa (4/08/).
Komisaun Ezekutivu Saúde ba Surtu COVID-19, Narcisio Fernandes, informa durante ema tama mai nia totál hamutuk nain 111, tama legál nain 105 no ilegal nain 6.
“Sira direta ba fatin kuarentena Tasi-Tolu. Depois loron 8 ekipa foti amostra sampel hodi teste iha loron 30 fulan Jullu, rezultadu teste positivu ida no agora pasiénte ne’e iha ona fatin izolamentu Vera-Cruz”, esplika Koordenadór Jerál Komisaun Ezekutivu Saúde ba Surtu COVID-19 ne’e.
Nia informa liu-tan, totál komulativu ba ezame laboratóriu hamutuk 4244 negativu ho totál 4186, ema iha kuarentena ka konfinamentu obrigatóriu totál hamutuk 256, Auto kuarentena totál 144 iha Díli 140 nomós iha Municipiu 4, no totál ema ne’ebé liu ona kuarentena ka konfinamentu obrigatóriu totál 2883, iha Díli 2462 no Munisipiu seluk nain 421.
“Evolusaun Surtu COVID-19 iha mundu tomak inklui mos iha Timor-Leste, tanba ne’e populasaun sira labele pániku, manten halo prevensaun tenki uza maskra, distancia sosiál, fase liman bei-beik ho sabaun, prevene halibur malu, iha grupu ne’ebe envolve ema barak.
Ikus, Koordenadór Jerál Komisaun Ezekutivu Saúde ba Surtu COVID-19, Narcisio Fernandes, husu komunidade hamutuk ho autoridade lokál sira iha area fronteira terestre tenkei kontrola komunidade sira ne’ebé kladestina mai Timor-Leste. Leo/Emj1.
