Suku Tolu iha Ossu Viqueque Halerik ba Estrada, Eletrisidade no Bee Moos
Naunil Media (Viqueque), Padre Rezidensiál Nahareka, Bernardino Moniz Da Silva, informa suku tolu (suku Builo, Nahareka Uaibobo) iha postu administrativu Ossu, Munisípiu Viqueque, dezde ukun-an to’o agora seidauk asesu ba dezenvolvimentu Estrada di’ak, eletrisidade no bee moos.
Padre Rezidensial Nahareka, Bernardino Moniz Da Silva, informa preokupasaun ne’e ba jornalista Naunil Media, hafoin selebra missa Finadu, iha Kapela Nossa Senhora Dasdores Abana Postu Administrativu Ossu, Segunda (2/11).
Pe. Bernardino, haktuir durante mandatu tinan rua ona rezidensial Nahareka maibe suku tolu mak mensionadu seidauk asesu ba dezenvolvimentu hanesan estrada, eletrisidade, bee moos.
Nune’e Nia husu ba líder nasionál, Governu atu fó atensaun ba preokupasaun povu ki’ik.
Iha Sorin seluk xefe aldeia Uaitau suku Uaibobo Paulo Da Cruz, hateten durante ukun aan suku Uaibobo no mos suku viziñu rua hanesan Builo no Nahareka la asesu ba estrada no eletrisidade no bee mos.
“Durante ukun-áan, ami nia suku Uaibobo no suku viziñu rua hanesan Builo no Nahareka la asesu dezenvolvimentu hanesan estrada no eletrisidade. Iha Tempu udan, família balu moras, kareta tama ladiak tanba estrada ladi’ak”, tenik Xefe aldeia Uaitau.
Suku Uaibobo iha aldeia sira mak hanesan, Uanisi, Leho, Sogau, Mundailo, Darenau Rk 5D, Samaliurai no Uaitau.
Suku Nahareka iha aldeia sira mak Macabu’u, Maurate, Darenau Rk3, Samarogo no Raila’a. Suku Builo iha aldeia Deluro, Buareka, Lutugia. Ivo
