Eskritor Luís Cardoso “Tacas” Apela Foinsa’e Badinas Lee Livru
Naunil Media (Díli), Eskritor (hakerek na’in) Timor oan, Luís Cardoso “Tacas”, ne’ebé hetan Prémiu Oseanu iha tinan 2021 no públika ona livru barak, nune’e husu ba Timor oan sira atu badinas lee livru nunee iha futuru aumenta vokabulariu, hodi halo buat barak.
Tuir Eskritór Timor oan ne’, atu sai eskritór ne’ebe di’ak tenke peskiza no lee livru hodi prepara referensia barak, no pratika hakerek uitoan kada loron bainhira hetan liafuan inportante ruma.
“Ha’u husu ba Timor oan sira lee livru lalika estraga tempu ba buat ne’ebe la iha vantajen ba ita nia futuru, ne’e-duni joven sira atu sai eskritór tenke lee barak, nune’e abanbainrua hatene domina vokabulariu entaun ita mos bele hakerek ona livru”, Tacas ba Jornalista sira iha salaun VIP Aeroportu Internasionál Komoro Dili, Kuarta (16/08).
Nia afirma, ida-idak tenki iha nia kunesimentu rasik nune’e bainhira atu hakerek ona bele aumenta ona vokabulariu balun no sai maka’as liu tan hodi tau importante ba liafuan sira ne’e tenke lee livru maka’as.
“Lee livru maka’as hodi hakerek didi’ak liu tan, ne’e mak eskritór, buat hotu-hotu tenke serbisu maka’as, ho ida ne’e mós nasaun barak maka traduz livru hirak ne’ebé eskritór Luis Cardoso hakerek hanesan iha Inglatera, Francesa, Alemão, Dinamarka no seluk tan”, dehan nia.
Nia profunda tan katak, hanesan Timor-Leste nia Funu no luta tanba hirak ne’e mak tau iha livru, mezmu ke Remas, Poezia no Istória, nune’e iha futuru husik hela memoria ba nasaun nian, tanba ne’e husu ba Timoroan hotu, ne’ebe iha interesante atu hakerek bele la’o tuir, maibé ida-idak buka nia dalan hodi hakerek di’ak no furak liu tan.
“Ha’u haree Timoroan barak halo sira nia Coutts furak teb-tebes, tanba ne’e balu manán premiu hosi Fundasaun Oriente. Timoroan barak sai eskritór di’ak teb-tebes, tanba ha’u iha esperansa boot futuru mai Timoroan barak bele sai Eskritór”, nia hakotu.
Livru sira ne’ebé eskritór Luis Cardoso hakerek ho lian Português de’it, no balun traduz ba lian seluk, Olhos de Crusa, Olhos de Gato Bravo, Ultimo Morte de Coronel Santiago, Requin Para o Navegador Solitariu kona-ba II Guera mundiál Japonese sira uluk invade Timor-Leste. Abhas
