SEKOMS-PPN Deskute Ajenda Hili Konsilleru Foun Substitui Expedito Dias Ximenes
Naunil Media (Díli), Kuarta (16/08) ne’e, Sekretáriu Estadu Komunikasaun Sosiál (SEKOMS), Expedito Dias Ximenes akompaña husi Xefe Gabinete, Elizeu Isaac Fernandes reuniaun ho Prezidente Parlamentu Nasionál (PPN), Maria FernandaLay akompaña husi Vise Prezidente Parlamentu Nasionál, Maria Terezinha Viegas kona-ba falta konsilleru ida iha Konsellu Imprensa Timor Leste (KITL).
Konsellu Imprensa kompostu husi konsilleru na’in-5 inklui na’in-ida hili husi Mídia Nain sira, na’in-rua hili husi Jornalista sira no na’in-rua hili husi Parlamentu Nasionál.
Na’in-rua ne’ebé hili husi Parlamentu Nasionál tuir Estatutu Konsellu Imprensa haktuir, na’in-ida espesialista iha area jurídiku no ida-seluk espesialista husi area jornalizmu.
Tanba ne’e, iha tinan 2021 Parlamentu Nasionál hili Expedito Dias Ximenes nu’udar espesialista husi area jornalizmu, maibé tanba Expedito Dias Ximenes assume fali pasta Sekretáriu Estadu Komunikasaun Sosiál iha Governu Konstitusionál Da-sia no aprezenta ona karta rezignasaun ba Konsellu Imprensa no Parlamentu Nasionál rasik iha loron 03 Jullu 2023, maibé to’o agora seidauk iha substituisaun.
Bainhira reuniaun ho Prezidente Parlamentu Nasionál, konfirma katak órgaun estadu daruak ne’e marka ona ajenda plenária hodi hili ema ida ba okupa hikas fatin iha konsellu imprensa, hafoin debate orsamentu retifikativu 2023 nian. */Kou
