PR Lú Olo Liu husi Nia-Gabineti Apoiu Nesesidade ba Vitima inundasaun
Naunil Media (Dili), Prezidente Repúblika (PR), Francisco Guterres Lú Olo, liu husi nia gabineti ne’ebé akompaña husi Xefi Casa Civil Francisco Maria de Vasconcelos hodi fahe nesesidade bazika ba vitima inundasaun sira husi Aldei Brimob Suku Hera.
“Objetivu primeiru mak Prezidente Repúblika hakarak espresa ninia solidariedade no hakarak apoiu ba populasaun ne’ebé mak afetadu ba dezastre naturais. Tanba ne’e mak Prezidente Repúblika Gabineti espoza no mós mobiliza mai husi Plan Internasionál mós akompaña para atu distribui sasán nesesidade bázika ne’ebé mak populasaun sira presiza” hatete Xefi Casa Civil ba jornalista bainhira fahe nesesidade bázika ba vitima sira iha Hera kuarta (07/04/2021).
Nia hatutan objetivu importante husi ajudus refere hanesan asaun solidariedade ida husi Prezidente Repúblika, hodi kontinua tulun vitima sira.
Iha Fatin hanesan esposa PR Cidalia Mouzinho Nobre Lopes Guterres deklara ajudus hirak ne’ebé sira fahe ba komunidade kontribui mai hosi Parseiru sira.
“Inundasaun ne’e halo ita laran taridu, triste liu mak sira ne’ebé mak lakon familia, sira ne’ebé mak salva aan no salva familia ne’e ita agradese tanba ita sei moris, Ohin mai ho Gabinete Prezidensial Repúblika hamutuk ho parseru sira hanesan plan Internasional, Redi feto, Fundasaun Sadia, lori netik Apoiu oituan hodi hatutan netik nesesidade ba loron balun nia”dehan espoza PR.
Nune’e mós xefi Bairo Brimob Rosito Fraga senti kontenti no agradese ba Primeira Dama ne’ebé apoiu sasán bázika ba sira mezmu uituan maibé valor boot ba sira.
Nesesidade ne’ebé Ajuda mak fos, mina, supermi, susu ben, manta, biti inklui nesesidade bazika sira seluk.
Tuir dadus Iha area Brimob aldeia Mota Kiik Suku Hera uma kain hamutuk 103 totál populasaun hamutuk 680. Husi uma kain hirak ne’e uma 16 ne’e mak mota konsege lori lakon.*jos
