PR Horta : “Sira Nain Rua Lutador, Xanana Líder Estratéjiku-Taur Líder Tátiku Militar”
Naunil Media (Díli), Presidente Republiks (PR), José Ramos Horta, hatete iha tempu rejistensia sira nain rua lutador, Kay Rala Xanana Gusmão núdar líder estratéjiku no Taur Matan Ruak núdar líder tátiku militar.
“Tempu sira ne’ebé liu bá, sira na’in rua hanesan lutadór bo’ot rua ba nasaun no povu ida ne’e, ida hanesan ema ne’ebé estratéjiku no ida seluk nu’udar tatiku militár no sira na’in rua iha vida polítika riku tebe-tebes ho esperénsia iha tinan 20 ba konstrusaun estadu”, PR Horta ba jornalista sira hafoin enkontru ho Sesante Primeiru Ministru, Jeneral Taur Matan Ruak no Primeiru Ministru Indijitadu Kay Rala Xanana Gusmão, iha Palásiu Prezidensial Nicolao Lobato, Bairo Pité, Sesta (30/06).
Xefe Estadu, Horta, haktuir “Ohin ho Maun Bo’ot Xanana, ami hasoru malu ko’alia nu’udar Primeiru Ministru sesante no Primeiru Ministru foun atu iha handover ne’ebé sei halo liga ho relatóriu, dokumentu, no buat hotu prontu husi VIII Governu konstitusionál ba nonu governu”.
Ramos Horta, hatutan, Primeiru Ministru sesante hatete ona sempre disponivel atu apoiu governu no fó ona orden ba Ministru sira ne’ebé atu sai ne’e katak sé bainhira Ministru foun sira presija atu esklarese buat ruma sira tenke disponivel atu nune’e servisu hamutuk ida di’ak atu tranzisaun ba governu foun ne’e la’o di’ak no ba futuru.
Ikus-liu, Horta agradese ba esforsu servisu tomak ne’ebe Primeiru Ministru sesante Jeneral Taur Matan Ruak halo ona durante mandate, maske tempu ne’ebé nia kaer defisil no todan. Ana
