PN Mantein ho Komisaun Espesializada Hitu
Naunil Media (Díli), Segunda (3/7/23) ne’e Parlamentu Nasionál (PN) liu husi reuniaun Plenaria ordinária halo ona diskusaun no votasaun ba Projetu Deliberasaun nú 3/VI kona-ba Konstitusaun Komisaun Espesializada Permanente sira iha VI Lejizlatura nian.
Liu husi diskusaun naruk kona-ba area tematiku liga ba kompetensia komisaun sira nian ho ministériu sira iha Governu IX nian, no ikus mai aprova ho 61 votus a favor, 0 kontra no 0 abstensaun.
Numeru Komisaun Espesializada Permanente ba lejizlatura ida-ne’e kontinua mantem 7 hanesan; Komisaun A, trata asuntu Konstitusionais no Justisa, ho nia membru Deputadu na’in 7; Komisaun B, trata asuntu Negosiu Estranjeiru, Defeza no Seguransa, ho nia membru Deputadu hamutuk na’in 11; Komisaun C trata asuntu Finansas Públika, ho nia membru hamutuk Deputadu na’in 10; Komisaun D, trata asuntu Ekonomia no Dezenvolvimentu, ho nia membru Deputadu hamutuk na’in 11; Komisaun E trata asuntu Infraestrutura, ho nia membru Deputadu hamutuk na’in 9; Komisaun F trata asuntu Saúde, Seguransa Sosiál no Igualdade Jeneru, ho nia membru Deputadu hamutuk na’in 9 no Komisaun G trata asuntu Edukasaun, Juventude, Kultura no Sidadania, ho nia membru Deputadu na’in 7.
Alende ne’e iha Sesaun plenaria ne’e mós halo aprovasaun Projetu Deliberasaun nú 4/VI kona-ba Konstituisaun Komisaun Permanente, ho 45 votus a favor, 2 kontra no 14 abstensaun.
Enkuantu Reuniaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira. Gyor
