Timor oan sei ba Servisu iha Alemaña ho de’it Pasaporte TL
Naunil Media (Díli), Prezidente Repúblika (PR), José Ramos Horta, informa Estadu Alemaña konkorda ona Timor-oan uza de’it pasaporte Timor-Leste (TL) ba servisu iha Alemaña.
“Iha asuntu ida mak importante liu lori ba Alemaña kooperasaun bilaterál Alemaña ho Timor-Leste, tanba tinan rua nolu (20) liu ba Alemaña hanesan parseiru importante ida, sira mós fó tulun ba harii ita nia setór marítima, la’ós de’it oferese ro ahi Nakroma ne’e 100% sira nia oferta”, PR Horta ba jornalista sira, hafoin fila husi nia vizita estadu ba Alemaña, iha Salaun VIP Aeroportu Internasionál Nicolao Lobato Komoro, Kuarta (28/06).
Xefe Estadu núdar mos simbolu unidade nasional ne’e haktuir, Alemaña sei kontinua apoia Timor-Leste, maibé liu husi Uniaun Europeia ho ajensia ONU sira, enkuantu sei lahalo kooperasaun bilaterál direitamente entre governu ho governu.
PR Horta, dehan primeiru sei hetan lai akordu formál ho Governu Alemaña tau Timor-Leste halo parte programa haruka traballadór, klaru ho pasaporte Timorense, la’ós pasaporte Portugés, maibé halo mós formasaun tékniku professional.
Atual Prezidente Repúblika no líder rejistensia 1974/1975 ne’e husu ba Alemaña atu tau matanba eskola tékniku profesionál sira iha Timor-Leste, akredita kurikulum eskola sira nian, hanesan Fatumaka no fó ekipamentu.
“Formasaun téknika profesionál ne’e sei halo iha Timor no halo mós iha Alemaña, maibé ne’e governu foun mai ho ministru ka sekretáriu estadu mak depois ho ekipa ida primeiru hahú ko’alia ho Embaixada iha Jakarta, sira sei mai iha Timor-Leste”. Tenik Horta. Ana
