Isabel Kandidatura Independente Ba PR, Nudar Inan Ba TL

Naunil Media (Díli),  Es Primeira Dama Isabel da costa Ferreira Ruak, Deklara  ohin  liu husi konferénsia imprensa iha Casa sidadania, hetan oportunidade ida-ne’e anunsia publikamente kandidatura independente ba Prezidenti Repúblika Demokrátika Timor-Leste hodi compete eleisaun prezidensiál ba períodu 2022 no 2027, nudar inan ba Timor-Leste.

“Ha’u aprezenta kandidatura ida ne’e nu’udar inan, nu’udar feen no nu’udar membru família bo’ot timor-oan sira-nian, ho espíritu serbisu, dedikasaun no sakrifísiu, tuir valór sira ne’ebé aas liu hosi umanizmu kristaun no doutrina sosiál igreja nian”, dehan Isabel da costa Ferreira Ruak liu husi konferensia iha casa sidadania Colmera Díli, segunda (31/01).

Nia afirma, Ne’ebé dudu ha’u atu foti pozisaun afavór ba dezenvolvimentu, kreximentu no progresu saúdavel nasaun nian,  ho nia eransa ne’ebé ita hotu hakarak husik hela ba ita-nia oan sira no ba jerasaun tuir mai.

Tanba ho fiar katak konstrusaun sosiedade ida ekonomikamente justu no sosialmente ekuitativa, depende ba serbisu, empeñu no esforsu hamutuk afavór ba moris-di’ak no ba monitorizasaun konstante ba administrasaun justisa nian, dehan nia.

“Ha’u mós aprezenta ha’u nia kandidatura nu’udar ativista Direitu Fundamentál sira, tanba ne’e ha’u fiar iha importánsia sidadania ida, ativa, esklaresida, interesada no partisipativa, individual ka organizadu, afavór ba kauza bo’ot polítika no sosial, ne’ebé mak presiza atu luta, se ita hakarak harii Timor-Leste ida ne’ebé di’ak, modernu, solidáriu, voluntáriu, tolerante no pasífiku liu tan”, katak nia.

Iha podér prezidensiál ne’ebé la hakerek iha Konstituisaun Repúblika Demokrátika Timor-Leste (RDTL),  no lei sira maibé hahoris husi politika prátika, jurisprudénsia ne’ebé influensia papél majistériu no konsidera iha kualidade aktivismu nu’udar funsaun esensial atu bele motiva, enkoraja, insentiva no mobiliza nasaun Timor iha tornu polítiku sosial hodi inisia diálogu polítiku no sosial ba kestaun sira ne’ebé sensivel ba nasaun, nia haktuir.

Nia hatutan, Prezidente Repúblika iha partidu polítiku nia leten, no tane as interese komún hodi garante no asegura demokrásia no respeita ba Konstituisaun RDTL.

Nu’udar  kandidatura ida independente, aberta no a-partidária iha nia orijen, ne’ebé konvida ba mobilizasaun esforsu no vontade sira, aseita no hamahon ema hotu-hotu ne’ebé partilla mehi ida kona-bá país ida modernu no dezenvolvidu, nia promote.

 Ho sidadaun ida ne’ebé preparadu di’ak, kualifikadu no aproveita oportunidade tomak hosi edukasaun, formasaun no kreximentu, la haree ba sira-nia kondisaun sosiál, orijen etno-jeográfika, ka sira niia konxiénsia polítika no relijioza, nia hakotu. Ana