COVID-19 Iha TL Konsidera Tama Kategoria Lijeiru No Moderadu
Naunil Media (Díli), Porta voz Sentru Integradu Jestaun Krize (CIGC-Sigla Português), Rui Maria de Araújo, hateten pasiente konfirmadu COVID-19 iha Timor-Leste hamutuk nain 18 ne’e sei tama iha kategoria lijeiru ho moderadu, tanba sei iha kondisaun di’ak no lagrave.
“Lijeiru ne’e sira laiha sintoma no moderadu ne’e sira iha sintoma maibé seidauk maka’as,” dehan Rui Maria de Araújo, bainhira aprezenta senáriu COVID-19 ba jornalista sira iha Centro de Convenções de Dili (CCD), Sabadu (18/04).
Porta voz CIGC, Rui Maria de Araújo, informa liután konfirmadu sira ne’ebé daudaun ne’e izola iha Sentru Saúde Vera Cruz toma ba kategorio lijeiru moderadu no seidauk tama ba grave.
“Lijeiru ne’e mak agora daudaun, ha’u aproveita esplika kedas katak hanesan ema sira agora iha Vera Cruz ne’e. Sira haruka mensajen ba ema liur sira katak la moras ida, loos katak sira la moras duni ne’e singnifika sira lijeiru hela ne’e”, tenik Eis Primeiru-Ministru ne’e.
Tuir Nia, Timor-Leste sei tama iha tipu moderadamente otimista ho pursentajen atake ba populasaun pursentu 1 (%) ho totál infetadu hosi ema nain ida bele daet ona to’o 13.000, enkuantu tipu menus otimista maka atake ema pursentu 5% ho totál populasaun 65.000, Pesimista ho pursentajen 10 (%) ba ema 130.000 no super pesimista pursentu 30 (%) infeitadu ba ema 390.000.
“Entaun persentajen ne’e, mai husi attack rate, signifika moras ne’e atake ema nain hira ona ho totál populasaun Timor-Leste millaun ida rihun 300. Moras ne’e atake ba iha 5 (%) ema sa’e ba rihun 65, se moras ne’e ba 10 (%) signifika ema ne’e sa’e ba rihun 130, se nia sa’e ba 30 (%) signifika rihun 390 ema mak hetan infesaun ba COVID-19” dehan Nia.
Tuir senáriu hosi dadus internasionál liliu Organizasaun Mundiál Saúde nian katak, bainhira populasaun porsentu 1 (%) maka hetan atake hosi COVID-19 sei infetadu ba ema 13.000. Hosi númeru ne’e fahe ba kazu lijeiru ho pursentu 40 ho totál ema 5.200, Kazu moderadu pursentu 40 (%) ba ema 5.200, kazu grave pursentu 15 ho ema 1.950, kazu grave verilasaun ho pursentu 5 (%) ba ema 650 no óbitu pursentu 3 (%) ho ema 390. Ana
