MAE, Abílio: Prosesu Rekolla Fixa Família Remata
Naunil Media (Dili), Vise Ministru Administrasaun Estatal (MAE), Abílio José Caetano, hateten prosesu rekolla fixa ba kada família Ministériu Administrasaun Estatal nian, remata iha loron 8 fulan Maiu ne’e.
Vise Ministru Administrasaun Estatal, Abílio José Caetano ba jornalista sira iha edifisiu Ministériu Negósius Estranjerus Koperasaun (MENK), Praias dos Coqueros, Kinta (07/05).
“Prosesu rekolla fixa kada família ne’e la fasil, maibé ita-nia xefe suku no xefe aldeia sira halo ona esforsu e horseik balun hatama. Sexta 08/05 ne’e ami sei enkontru ho administradór munisípiu sira kona-ba fixa família iha nivel munisipal, nivel postu administrativu, nivel suku no aldeia ne’ebé sira hala’o”, informa membru governu konstitusionál da-ualu, Abilio.
Governante ne’e hatutan, tuir planu ne’ebé governu atu fó apoia ba família ne’e loos ona, ministériu solidaridade sosiál no inkluzaun (MSSI) sei haruka pedidu ida ba fali Ministériu Finansas (MF) hodi transfere orsamentu ba kada familia iha munisípiu sira.
“MSSI sei halo pedidu ba Ministeriu finansas hodi bele transfere osan ne’e ba númeru família iha munisípiu sira hotu”, Sublina Nia.
Ikus liu Nia dehan, “Transfere orsamentu ne’e sei ba munisípiu sira no sei liuhosi konta bankaria kada suku tuir lista ne’ebe xefe suku ho xefe aldeia sira rekolla ona”. Apm
