Fretilin no Khunto Husu Governu Buka Fukun Subsídiu U$100.00

Fahe Tutan

Naunil Media (Díli), Bankada Fretilin no Khunto iha Parlamentu Nasionál husu ba governu buka tuir fukun ba subsídiu dolar U$100.00  ne’ebe to’o agora seidauk fahe ba povulasaun, tanba dadaun ne’e sira hein hela maibe osan sira ne’e seidauk to’o ba sira nia liman.

Deputadu bankada FRETILIN, Silvino Morais, hateten relasiona ho Estadu Emerjénsia, subsídiu ba komunidade mos seidauk boók an, ne’e kauza la’òs regras maibé implementadór liu-liu ba membru governu sira mak laiha vontade servisu.

“Ba ha’u kauza tarde  hosi subídiu ne’e nia kauza la’òs regras maibé kauza husi  implemetadór liu-liu membru guvernu, sira dalruma implementa ne’e mak ho lian bahasa karik, ‘ada apa di balik itu’”, hateten Deputadu bankada FRETILIN, Silvino Morais, liuhosi nia intervensaun polítika iha Plenária Parlamentu Nasionál, Tersa (26/05).

Reprezentante povu iha Uma Fukun ne’e hatutan, hafoin desizaun governu aprova ona estensaun estadu emerjénsia ba datoluk nian iha Konselu Ministru, komunidade balun rona ida ne’e komesa krítika maka’as ona ba parte governu, tamba subsídiu ladauk fahe maibe estadu emerjénsia kontinua aumenta.

“horseik ita foin rona Governu atu estende tan Estadu Emerjénsia, ne’e horkalan komunidade sira kontinua kolia ona tanba subsídiu seidauk fahe maibé aumenta tan ona Estadu Emerjénsia”, tenik Nia

Iha fatin hanesan deputada, Olinda Guterres, reforsa, povu preokupa hela subsídiu U$100.00 ne’ebé Governu promete atu selu maibé to’o agora seidauk.

“Husu ba Governu atu responde lalais, tanba povu halerik hela ba subsídiu U$100.00 ne’e. Husu ba Governu buka tuir toók fukun ne’e iha ne’ebé ?, ne’e mak to’o agora subsídiu ne’e seidauk to’o populasaun nia liman”, dehan deputada bankada KHUNTO, Olinda Guterres.

Hatan ba preokupasaun nee, Porta voz Governu, Merício Juvinal dos Reis ‘Akara’, hateten subsídiu U$100.00, governu sei ezekuta maibe tenke haree mos ba aspeitu legal sira no fundu ne’ebé iha mos limitadu tebes.

“Liga ba subsídiu governu labele ezekuta naran-naran de’it no fim governu mak sala fali, tanba ne’e Governu  tenke haree mos bá aspeitu legál sira, no ida seluk tanba ita nia fundu ne’e limitadu,  ne’e mak semana kotuk jestór ba fundu ida ne’e halo exersísiu maka’as hodi reduz item balun hosi  Ministériu hotu-hotu  atu nune’e rezolve subsídiu ba uma kain sira nomós estudante sira iha rai-li’ur”. dehan SEKOMS, Akara. Uar

Leave a Reply

Your email address will not be published.