COVID-19 : MS Apela Komunidade Mantein Kumpri Regra Prevensaun
Naunil Media (Díli), Ministra Saúde (MS), Odete Maria Freitas Belo, hateten maske Timor-Leste COVID-19 la iha ona, maibé husu ba komunidade sira hotu atu nafatin kumpri regulamentu ne’ebé mak Organizasaun Mundial Saúde (WHO-Sigla Ingles) estabelese.
“Nafatin alerta, kazu COVID-19 ne’e sei iha, tanba ne’e husu ba komunidade atu nafatin uza maskra, fase liman, maintein distasia, se bele hapara festa, tuur hamutuk grupu, ne’e ita presiza limite”, afirmasaun ne’e Ministra Saúde Odete Maria Freitas Belo, ba jornalista sira hafóin enkontru semenal ho Prezidente Repúblika (PR), Francisco Guterres ‘Lú Olo’ iha Palásiu Prezidensiál Nicolau Lobato, Bairu Pité, Kinta (02/06).
Membru Governu konstitusionál da-ualu ne’e, hatutan haree ba kondisaun no situasaun Timor nian ne’ebé mak dadaun ne’e iha, presiza ema hotu-hotu nia kontribusaun no komprensaun atu nafatin antisipa Surtu COVID-19 atu labele mosu fila-fali iha Timor-Leste.
“Ami kontinua koalia fó sai hosi Televizaun atu ema hotu nafatin kumpri protokolu preventiva hirak ne’ebé estabelese ona”, tenik Nia.
Ikus-liu, Ministra Odete, afirma maske dadaun ne’e Surtu COVID-19 iha Timor-Leste la rejista kazu fóun maibé husu atu ema hotu nafatin antisipa tanba korona virus seidauk hotu iha mundu. Dms
