TL Partisipa Primeira e-Conferensia AIPS Mundiál

Naunil Media (Díli), Assosiasaun Jornalista Desportu Mundial (AIPS-Association Internationalle Presse Sports) realiza primeira e-konferensia mundiál hodi komemora loron mundiál jornalista desportu nian ne’ebe monu iha loron 2 Jullu.

Iha primeira e-conferensia ne’e, AIPS konvida Timor-Leste ne’ebe reprezenta hosi Prezidenti Assosiasaun Jornalista Desportu Timor-Leste (AJORSTIL), Evangelisto Gantry dos Santos Meilana.

“Reprezenta Timor-Leste (AJORSTIL) hau hato’o ita nia agradese ba AIPS ne’ebe konvida ona Timor-Leste bele partisipa iha eventu internasionál nian ne’e no hato’o kongratulasaun ba jornalista desportu iha mundu tomak ne’ebe selebra nia loron mundial ba jornalista desportu,” dehan Evangelisto Gantry dos Santos Meilana, ne’ebe dadauk ne’e sai CEO ba VIP TV.

E-conferensia ho topiku Has COVID-19 Affected Journalists Independence and Future? ne’e partisipa hosi konfresista hamutuk nain 330 hosi pessoal sira ne’ebe reprezenta hosi ida-ida nia nasaun, inklui parseiru AIPS sira nian ne’ebe hosi federasaun desportiva internasional sira, Olympic Games no jornalista desportu konesidu iha mundu.

Iha eventu ne’ebe modera hosi Jura Ozmec (Kroasia) hamutuk iha panelis 11 ne’ebe fahe sira nia hanoin no esperensia kona ba kobertura jornalista desportu sira iha eventu desportu no oinsa jornalista sira halo kobertura iha pandemic COVID-19 nian.

Eventu internasional ne’e loke hosi Presidenti AIPS, Gianni Merlo (Italia) ne’ebe hatoo nia kongratulasaun ba jornalista desportu iha mundu tomak no husu jornalista sira kontinua kuidadu an wainhira halo kobertura relasiona ho pademiku COVID-19.

Prezidenti IOC, Thomas Bach (Alemana) mos hato’o ninia parabens ba AIPS ne’ebe realiza konferensia ne’e no eventu refere importante tebes ba jornalista desportu hotu iha mundu tomak no nia hatoo katak IOC sei servisu hamutuk ho AIPS hodi hare kona ba publikasaun ba atividade desportu nian iha eventu-eventu desportu mundial.

Entertantu, Vise Prezidenti AIPS Evelyn Watta hatoo nia palavras kona ba rasismu iha desportu. Iha nia intervensaun ne’e, nia fahe kona ba esperensia kobertura nian kona lalaok rasismu ne’ebe akontese iha atividade desportu nian.

Panelis 11 ne’e maka Badreddine Drisi Lasini hosi Maroko nu’udar Xefi Redasaun Almountakhab, Kwabena Yeboah (Xefi Redasaun Africa Sports, Ghana), Christine Brennan (Sports Columnist USA Today, EUA), Carlos Ponce (Xefi Redasaun Récord, Mexico), Sandeep Dwivedi (Editor Desportu Nasional, The Indian Express, India), Shinsuke Kobayashi (Deputy Managing Editor of Olympic and Paralympic News Office Kyodo News, Japaun), Stefano Barigelli (Xefi Redasaun La Gazzetta dello Sport, Italia), Jérôme Cazadieu (Xefi Redasaun L’Équipe, Fransa), Juan Ignacio Gallardo (Xefi Redasaun Marca, Espana) no Tracey Holmes (Senior Reporter ABC News, Australia.

AJORSTIL harii iha Setembru 2016 hosi jornalista desportu sira ne’ebe durante ne’e halo kobertura iha area desportu nian. AJORSTIL mos halo ona komunikasaun dala barak ba AIPS Asian no internasional kona ba AJORSTIL nian prezensa iha Timor-Leste no pronto sai familia bo’ot AIPS nian hodi habelar notisias no atividade desportu nian iha mundu tomak, inklui iha Timor-Leste.**/Tri