Arantes ho Ekipa Sosializa Programa Fila ba Suku Liberta Povu

Naunil Media (Manufahi), Kinta (10/09) ne’e, Administradór Munisípiu Manufahi, Arantes Isaac Sarmento lansa no hala’o sosializasaun programa Fila Ba Suku iha suku Rotuto postu administrativu Same ho objetivu liberta povu husi ki’ak no mukit.

“Programa fila ba suku la’os administrasaun munisípiu atu lori osan apoiu  komunidade sira, maibe programa ne’e atu integra ho programa suku nian nune’e lideransa ho komunidade sira bele iha inisiativa rasik hodi mobiliza ninia jerasaun suku ne’e  ninia oan sira ne’ebé iha kbi’it hodi tulun fali komunidade sira ne’ebé la iha kbi’it iha suku laran”, Administradór Munisípiu Manufahi, Arantes Isaac Sarmento, ba jornalista sira hafooin lansa programa Fila Ba Suku iha suku Rotuto.

Líder Munisípiu Manufahi ne’e esplika,  indikadór hodi hamosu programa fila ba suku ne’e bazeia ba ekipa komisaun COVID-19 hala’o vizita ba suku sira hodi hatutan apoiu nesesidade báziku ne’ebé kontribui  husi Manufahi oan sira hodi ajuda kbiit laek sira.

“Liu husi husi asaun ne’e Manufahi oan sira ne’ebé hela iha fatin seluk inklui iha Same laran hatudu ona sira nia sentimentu solidariadade no fuan bo’ot  hodi kontribui ai-haan  hodi tulun komunidade kbi’it laek sira, tanba ne’e administrasaun hamosu programa fali  programa fila ba suku ne’e hodi halibur fali forsa husi Manufahi oan sira ne’e iha Kbi’it sai hanesan movimentu forsa  solidariadade ida hodi tulun no harí uma ba komunidade sira ne’ebé la iha kbi’it iha suku laran”, tenik Arantes.

Tuir Nia, programa ne’e hahú husi suku Rotuto no  sei kontinua ba suku 28 iha munisípiu Manufahi kuandu programa ne’e implementa la’o dia’k iha suku hotu  bele  sai hanesan sasukat tinan rua ka tolu oin mai bele liberta ona povu husi ki’ak.

Iha fatin hanesan Xéfi suku Rotuto, José dos Santos apresia ho programa fila ba suku  no konsellu suku sira prontu implementa tanba bele redús ki’ak iha suku laran.

“Husu ba jerasaun suku Rotuto oan sira iha rai liur no rai laran atu hatudu fuan domin hodi kontribui no tulun komunidade Rotuto ne’ebé kbi’t laek nune’e bele liberta povu suku Rotuto husi ki’ak no mukit atu implementa programa ne’e” hateten Autoridade suku ne’e.

Relasiona ho programa ne’e konsellu ohin hahú estabeleze ona estrutura ba programa fila ba suku ninian simu toma pose husi administradór munisípiu, forsa hosi suku Rotuto nian hodi halo kontribuisaun  inklui identifika komunidade vulniravél sira ne’ebé presija tebes tulun.

Tuir observasaun jornalista iha terenu hafoin remata sosializasaun konsellu suku ho komunidade no joventude suku Roturo estabeleze kedas strutura suku nian ba programa Fila ba suku no tuir planu iha loron 10 fulan Outbru tinan 2020 sei toma posse inklui administradór munisípiu sei halo lansamentu ba programa fila ba suku. Nico