PR Lú Olo ho PM Taur Diskute Seguransa iha Fronteira
Naunil Media (Díli), Kinta (10/09) ne’e, Prezidente Repúblika (PR), Francisco Guterres Lú Olo hala’o reuniaun ho Primeiru Ministru (PM), Taur Matan Ruak, akompña husi Vise-PM, José Reis, Ministra Negosiu Estranjeiru no Kooperasaun (MNEC-Sigla Português), Adaljiza Magno no Ministru Defeza (MD), Filomeno Paixão hodi ko’alia kona-ba seguransa iha fronteira terrestres iha ámbitu COVID-19.
Durante diskusaun PR Lú Olo preokupa tebes ho sidadaun sira ne’ebé tama no sai klandestinamente mai territóriu nasionál tanba bele lori moras coronavirus no hadaet ba komunidade no ikusmai bele hamosu kalamidade públika.
Xefe Casa Civíl Prezidensia Repúblika, Francisco Maria de Vasconcelos, haktuir Xefe Estadu Timor-Leste (TL) preokupa tebes ho sidadaun sira ne’ebé tama no sai ilegalmente husi fronteira, tanba bele lori moras coronavirus mai Timor-Leste no fó ameasa ba saúde públika.
“Prezidente ho Governu diskute oinsá prevene ema tama sai ilegal atu labele iha transmisaun ba ita-nia sosiedade. Ita hatene katak sira ne’ebé mai liuhusi dalan ilegal dalaruma bele lori moras iha sira-nia isin. Tanba Prezidente preokupa ho situasaun ne’e mak konvida Governu atu diskute atu tau atensaun atu prevene moras ne’e” subliña Xefe Casa Civíl Prezidensia Repúblika, Francisco Maria de Vasconcelos.
Iha deklarasaun estadu emerjénsia dalimak, Prezidente Repúblika tau atensaun ba pontu entrada sira ba territóriu nasionál atu bele hasees-an husi risku coronavírus tama tan iha ita-nia rain. Sidadaun sira ne’ebé tama iha Timor-Leste tenke submete ba kuarentena, katak sei moris ketak iha fatin ida durante loron sanulu resin haat.
Preokupasaun ne’e sai pertinente tanba sidadaun sira tama sai ilegal no la tuir kuarentena hodi moris hamutuk iha komunidade hanesan bainbain. Tanba ne’e, Prezidente Repúblika husu ba Governu atu foti medidas implementasaun estadu emerjénsia ho restritu liután atu hotu-hotu hamutuk hases Timor-Leste husi kalamidade públika ne’ebé bele mai husi coronavirus.
Governu sei foti medidas atu hametin liután seguransa iha parte fronteira terrestres no postu entrada sira no sei impoin regras ba sidadaun rasik. Bainhira hetan ema ruma tama no sai ilegalmente tenke buka tuir atu tau iha kuarentena.
“Bainhira tolera ema ida ka rua, bele halo transmisaun ba populasaun no lori impaktu boot ba sidadaun tomak,” Chefe da Casa Civíl hateten. Pau/Emj9
