“9 Novembru 1998” Joventude Rezistensia ho Membru FALINTIL Asalta KORAMIL Alas Manufahi
Naunil Media (Manufahi), Prezidente Konsellu Veteranu no Kombatente Libertasaun Nasionál Munisípiu Manufahi, Tobias Amaral Magno ‘Maksakur’, haktuir levantamentu “9 Novembru 1998” joventude rezistensia hamutuk ho membru FALINTIL sira asalta KORAMIL iha postu administrative Alas, Munisípiu Manufahi.
“Hanesan asaun salva guarda, tanba militár Indonézia planeia ona iha loron 11 fulan-Novembru 1998, sira ho Timor oan Pro-Autonómia iha postu Alas, atu halo limpeiza (oho moos sidadaun rezistensia) no halo kapturasaun masal ba joven no responsavél rezisténsia, inklui populasaun sira iha postu Alas”, Eis-Sekretáriu Zona Rezistensia Postu Alas, Tobias Amaral Magno ‘Maksakur’, ba jornalista sira hafoin partisima aktividade Semináriu ho Tema Ispíritu 9 Novembro, Ita Hametin Unidade Nasionál, Tane Ita Nian Istória no Harii Futuru.
Aktividade semináriu ne’e hala’o iha Postu Alas, Segunda (30/11) hodi selebra aniverásiu loron ‘Levantamentu 9 Novembru 1998’ ba dala-22 (9 Novembru 1998 – 9 Novembru 2020).
Maksakur hatutan, Levantamentu 9 Novembru 1998 refere akontese, hafoin responsável no joven rezisténsia sira iha postu Alas halo pedidu dala tolu ba gerileiru rezistensia FALINTIL, nune’e ikus-mai, sira hamutuk asaltu ba KORAMIL Alas.
“Levantementu Alas iha loron 9 Novembru 1998, joven rezistensia ho membru FALINTIL halo asaltu ba KORAMIL Alas. Durante asaltu, joven rezistensia ho membru FALINTIL hadau kilat hamutuk 36 no oho militár Indonézia nain tolu (3)”, konta tuir husi eis-sekretáriu zona rezistensia postu Alas, Maksakur.
“Hafoin akontese levantamentu ne’e, militár Indonézia hamutuk ho Timor oan Pro-Autonómia halo asaltu no torturasaun ba joven rezistensia no populasaun sira, konsege oho ita (sidadaun pro-independensia) nain 8 inklui Vise-sekretáriu Zona postu Alas, Saúdozu Vicente Xavier Sikat Seluk”, esplika nia. Nfm
