KHUNTO Retira Hosi Koligasaun Foun AMP
Naunil Media (Dili), Partidu Kamanek Haburas Unidade Nasionál Timor Oan (KHUNTO) deside retira hosi nia aliadu koligasaun foun Aliansa Maioria Parlamentar (AMP).
Liuhosi karta iha 29 Abríl 2020, ba prezidenti partidu Congresu Nasionál Rekonstrusaun Timorense (CNRT), Kay Rala Xanana Gusmão, hodi deklara partidu KHUNTO sai hosi hosi AMP Foun hodi solusiona situasaun polémika empase polítika mak akontese durante tinan tolu nian laran.
Partidu Khunto nian karta reziknasaun ba prezidente partidu CNRT ho númeru 037/P.KHUNTO/IV/2020 hodi deklara katak sai hosi koligasaun foun ne’ebé forma hamutuk kompostu hosi partidu CNRT, Partidu Demokratiku (PD), União Democratico Timorense (UDT), Frenti Mudansa (FM) no Partidu Unidade Dezenvolvimentu Demokratiku (PUDD).
“Ita haree ba situasaun atuál polemika rai-laran, laiha serteza ba solusaun empase polítika ne’ebé akontese durante tinan tolu nian laran. Hanesan partidu polítiku tenke iha pozisaun polítika hodi fó solusaun ba impase polítiku ne’ebé akontense iha rai laran”, hateten Prezidenti partidu KHUNTO, Armanda Berta, liuhosi nota karta deklarasaun ne’ebe Naunil Media asesu, Kuart (29/04).
Partidu Khunto konsidera deklarasaun konfiansa no apoiu tomak hosi Prezidenti Repúblika, Francisco Guterres ‘Lu Olo’ ba iha primeiru Ministru Taur Matan Ruak, katak atu lidera nafatin governu daualu. Nune’e KHUNTO hola parte mos iha estrutura governu konstitusionál da-ualu, deside sei fó apoiu tomak ba to’o iha tinan 2023.
“Ho konsiente rasik, iha momentu ida ne’e hakarak hato’o agradese wain ba Maun Bo’ot Xanana Gusmão nu’udar líder partidu CNRT no AMP ho partidu PD, UDT, FM, no PUDD, ne’ebe durante ne’e ita servisu hamutuk, ho momentu importante ida ne’e iha situasaun defísil tebes mai partidu KHUNTO atu foti desizaun, tanba haree ba interese povu no ita nia estadu mak partidu KHUNTO foti desizaun sai hosi koligasaun AMP foun”, deklara Prezidente Partidu Khunto Armanda Berta.
Ikus liu, Partidu KHUNTO promote sei tane às nafatin Maun Bo’ot Kay Rala Xanana Gusmão no prontu atu servisu hamutuk iha tempu oin ba interese povu no nasaun doben Timor-Leste. Uar
