SEKOMS Reprezenta MAPKOMS Partisipa Reuniaun Plenária PN
Naunil Media (Díli), Sekretáriu Estadu ba Komunikasaun Sosiál, Merício Juvinal dos Reis “AKARA”, reprezenta Ministru Asuntu Parlamentár no Komunikasaun Sosiál, Francisco Jerónimo, partisipa iha reuniaun plenária, tersa-feira, loron 15 fulan-dezembru tinan 2020, iha Uma Fukun Parlamentu Nasionál.
Iha reuniaun ne’e plenária ne’e, Deputadu sira aprezenta relatóriu fiskalizasaun husi Komisaun Finansas Públikas relasiona ho fiskalizasaun ne’ebé hala’o iha munisípiu Covalima (husi loron 19 to’o 22 fulan-fevereiru tinan 2020) no husi Komisaun Ekonomia no Dezenvolvimentu relativu ho fiskalizasaun iha munisípiu Manufahi (husi loron 8 to’o 10 fulan-jullu tinan 2020) no iha Bobonaro (husi loron 22 to’o 25 fulan-jullu tinan 2020).
Aleinde ne’e, Deputadu sira hala’o mós aprezentasaun kona-ba relatóriu fiskalizasaun husi Komisaun Infraestrutura relativu ho fiskalizasaun iha RAEOA/ZEESM (husi loron 7 to’o 12 fulan-jullu tinan 2020) no husi GMPTL relasiona ho vizita ba munisípiu Ainaro iha loron 13 fulan-outubru tinan 2020.
Hafoin aprezentasaun relatóriu fiskalizasaun, iha reuniaun plenária ne’e, membru órgaun lezilativu sira hato’o preokupasaun ba SEKOMS relasiona ho problema estrada, eletrisidade, edukasaun, saúde no programa sesta bázika.
Hatan ba preokupasaun deputadu sira nian, Merício Juvinal dos Reis “AKARA”, iha ninia intervensaun hateten nia parte sei hato’o kestaun hirak ne’e ba ministériu relevante atu hetan solusaun tuir orsamentu ne’ebé preve ona.
Enkuantu ligadu ho eletrisidade, SEKOMS reforsa nia parte sei informa ba ministériu kompetente nune’e bele garante fornesimentu enerjia elétrika durante periodu natal no tinan foun.
Iha biban ne’e, deputadu sira fó votu kongratulasaun ba tinan 80 Dioseze Dili nian. */Tri
