PR Lú Olo Promulga Dekretu-Lei Fó Insentivu Finanseiru Estraordináriu Ba Sukus
Naunil Media (Díli), Prezidente Repúblika, Francisco Guterres Lú Olo, promulga ohin dadersan Dekretu-Lei aprova husi Governu atu fó Insentivu Finanseiru Estraodináriu ba Sukus.
Insentivu finanseiru estraordináriu ne’e sei atribui ba xefes sukus, xefes aldeias, pesoál ne’ebé fó apoiu ba Administrasaun Suku no kolaborador sira, nu’udar rekoñesimentu husi Estadu ba servisu sira ne’ebé ita-nia ema sira tenke halo hodi ajuda Governu implementa programa asisténsia ba família sira iha ámbitu Covid-19.
Naunil Media asesu komunikadu imprensa, liu husi pájina espesial Presidência da República Democrática de Timor-Leste, Díli, 16 Dezembru 2020.
Programa rua ne’e mosu atu hamenus susar ba família sira hafoin moras Covid-19 sai ameasa ba mundu tomak no Timor-Leste tama iha Estadu Emerjénsia atu hasees-an husi kalamidade públika ne’e.
Iha nível mundiál, nasaun ida-idak tenke duni foti medidas prevensaun oioin atu prevene no kombate moras ne’e, ne’ebé ikusmai lori impaktu boot ba ekonomia nasionál no konsekuentemente hatodan kondisoins finanseiras no sosiais ba família ida-idak no populasaun en-jerál.
Iha fulan hirak ba kotuk ne’e, Governu dezenvolve programa asisténsia oinoin atu hamenus todan finanseiru ba família ida-idak liuhusi “Subsídiu Uma Kain” ne’ebé konkluídu tiha ona no programa “Cesta Básica” iha faze ezekusaun.
Papel xefe sukus no xefe aldeia iha traballu preparatóriu to’o ezekusaun programa hirak ne’e importante tebetebes. Sira-nia papel importante tebes iha rejistu no atualizasaun “ficha da família” ne’ebé integra iha Livro rejistu Uma Kain no Livru Administrasaun Suku, rai dokumentus, distribuisaun osan, sasán no voucher, utilizasaun konta bankária no mobilizasaun ema.
Subsídiu estraordináriu ne’e sei selu dala ida de’it no sei transsfere ba konta bankária suku nian. Xefe suku ida-idak sei simu US$ 200, Xefe Aldeia US$ 100 no Pesoál Apoiu ba Administrasaun Suku sei simu mós US$ 100.
Valór Kompensasaun ba kolaborador sira ne’ebé fó apoiu ba Governu fahe “Cesta Básica” iha suku sira sei define liuhusi diploma ministeriál husi Ministru Administrasaun Estatal. */Pau
