Horta Konkorda Estende SS, Implementa Multa Ba Sidadaun Tama Ilegal
Naunil Media (Dili), Eis Prezidente Repúblika José Manuel Ramos Horta konkorda governu Estende Serka Sanitária. Maibé tenke implementa multa ba sidadaun hirak ne’ebé tama ilegal husi liña Fronteira.
“Ha’u konkorda estende serka sanitária, tenke taka fronteira metin multa todan ba ema ne’ebé viola ita nia lei regras estadu emerjensia lei imigrasaun tama ilegal fronteira ha’u hatene imposivel kontrola 100% lae, entaun presiza implementa multa ba ssidaun sira tama ilegal”, İnforma Eis Prezidente Repúblika bainhira remata enkontru ho Prezidente Repúblika Francisco Guterres ‘Lú Olo’ iha Palásiu Prezidente Bairru Pite tersa, (30/03).
Lider Nasional ne’e deklara iha nasaun dezemvolvidu maske iha ekipamentus ne’ebé avansada maibé la konsege salva nia populasaun sira husi covid-19. Tanba ne’e governu TL presiza halo kontrolu rigorozu.
“Ita tenke esforsu makas liu tan tanba ita sorti tinan ida resin ona laiha ema ida ke mate vasina atu mai dadaun entaun ita tenta kontrola liu tan oinsá serka sanitária ita haree ezemplu Nova Zelándia kazu ida de’it sira taka rai tomak tanba ne’e mak Nova Zelándia kuaze laiha kazu ida”, nia deklara
Premiadu Nobel da Paz ne’e dehan, governu halo ona esforsu atu vasina ona frontline sira mezmu ke vasina ne’e la 100 % ba maibé pelumenus 80% ne’e tenke vasina tanba imunidade ne’e bele mai husi vasina no imunidade ne’e mós bele mai husi ema nia organizmu rasik.
Tuir Dadus Dadaun ne’e Timor-Leste rejista kazu ativu 342 Rekopera ona 174 mate la Iha.Jos
