PM Taur: Mal Nutrisaun Iha TL 47% Númeru Bo’ot Liu Iha Ermera
Naunil Media (Ermera), Primeiru Ministru (PM) Taur Matan Ruak hateten, Atu kombate mal-nutrisaun no seguransa alimentar iha Timor-Leste ne’e problema nasionál, tanba iha Timor laran kuaze 47% mal-nutrisaun.
“Ita bo’ot sira hatene kombate mal-nutrisaun no mós seguransa alimentar ne’e problema ida nasionál, Timor laran tomak ita iha 47% mal-nutrisaun, Ermera de’it 63% Munisípiu ida mal-nutrisaun bo’ot liu iha Timor”, dehan Xefe Governu liu husi diskursu bainhira lansa programa nutrisaun no seguransa alimentar iha Railaku, Sabadu (09/07).
Taur hatutan, Governu mós preokupa futuru labarik sira nian tanba wainhira labarik sira nia saúde ladiak inan aman lakon no mós nasaun lakon.
“Ami preokupa futuru ita nia oan sira nian, hanesan ai-oan karik sé ita bo’ot sira larega la tau estrume ai ne’e nia fuan ladi’ak, ita bo’ot sira nia oan mós hanesan, se karik nia tanis mak ita bo’ot sira to’o ba fó netik ai-farina ida ba sira no fó netik bee ida ba sira, sira nia saúde ladiak ita bo’ot sira lakon nasaun lakon”, katak Taur.
PM hateten, Hakarak oan sira saúde di’ak, entaun favor ida koopera tau matan ba ida ne’e, no kampaña ida ke desde uluk sei Prezidente Repúblika, iha mundasa uituan mas presiza servicu barak tanba ne’e agradese ba Prezidente Repúblika tanba bele kompartilla ho guvernu, Parlamentu Nasionál, Parseiru dezenvolvimentu sira.
Nune’e atu hadia nutrisaun no seguransa alimentar hodi aumenta produtividade iha futuru no liuliu saúde labarik sira nian iha prezente.
Nune’e mós Prezidente Autoridade Munisípiu Ermera Eusebio Salsinha hateten, Problema mal-nutrisaun sai Preokupasaun ba Munisípiu Ermera tanba tuir dadus katak nutrisaun ladiak kuaze persentazen sa’e to’o 60.
“Problema mal-nutrisaun ne’ebé nu’udar sai Preokupasaun ba Munisípiu Ermera, tanba dadus husi organizasaun mundiál ba saúde ne’ebé determina katak Ermera iha nutrisaun ladiak ho persentazen ida ne’ebé 60%”, katak PA Ermera. *Jos
