FEATUREDIkus LiuNewsPolitika

Austrália Kontinua Apoia TL Luta Kontra COVID-19

Fahe Tutan

Naunil Media (Díli), Primeiru Ministru, Taur Matan Ruak, informa foin lalais ne’e nia parte halo kontaktu ho ninia omólogu Australianu, Scott Marrison, ne’ebé hatudu kompromisu atu apoia nafatin Timor-Leste (TL) hodi luta ba kontra COVID-19.

Iha konversa telefónika durante minutu 12, Xefe Governu país viziñu rua ne’e  profunda liu-tán relasaun no koperasaun país rua nian ba oin, ne’ebé Austrália prontu ajuda Timor-Leste ho ekipamentu médiku balun tan no tékniku iha laboratóriu.

“Ha’u rasik iha sesta-feira (24/04), ko’alia ho Primeiru Ministru Austrália nian hodi husu apoia, maibé nia (Scott Marrison) dehan ba ha’u daudaun ne’e ho situasaun ne’ebé iha sei defísil, maibé buat ki’ik sira kontinua nafatin apoia hanesan mos país sira seluk atu bele hakbiit-an hodi enfreta situasaun ida ne’e”, hateten PM Taur, iha Palasiu Governu, bainhira partisipa iha debate Renovasaun ba Deklarasaun Estadu Emerjénsia iha Parlamentu Nasionál, Segunda (27/04).

PM, Taur Matan Ruak, hatutan iha Sesta foin lalais ne’e, Xefe Governu nasaun rua ne’e halo diskusaun ida ne’ebé mahon hodi hato’o sira nia solidaridade no apoia ba dezafíu ne’ebé nasaun rua ne’e hasoru.

“Kauza husi COVID-19 ne’ebé alastra ona ba mundu tomak, nune’e mós fahe esperiénsia kona-ba oinsá jere COVID-19 no promete atu kontinua ho asaun ne’ebé efetivu entre Austrália ho Timor-Leste hodi hamutuk luta hasoru surtu vírus ne’e”, tenik eis gerileiru ne’e.  

PM, Tau agradese tebes ba apoiu no solidariedade hosi Governu no povu Australianu, embora iha Austrália mos hasoru problema COVID-19.

Ikus liu, PM Taur aproveita konversa telefónika ne’e, husu deskulpa ba ninia ómologu australianu, tanba labele vizita Austrália iha fulan Abríl hanesan promete ona. “Relasiona ho propagasaun pandemia globál ne’ebé afeta mundu tomak inklui mos Timor-Leste no sei ajenda ba okaziaun seluk”. Dehan PM, Taur. Ana

Leave a Reply

Your email address will not be published. Required fields are marked *