Telemor Sei Aumenta Internet 5G Iha TL
Naunil Media (Díli), Konpaña Telekomunikasaun Telemor sei halo esforsu tomak atu introduz teknolojika 5G hodi halais liña Internet iha Timor-Leste (TL).
Lia hirak ne’e hato’o husi diretur jerál Telemor Tran Van Bang ba jornalista sira hafoin remata enkontru ho Prezidente Repúblika (PR) José Manuel Ramos Horta iha palásiu Prezidensiál Nicolau Lobato Bairru Pite, Segunda (11/07).
“Iha TL tanba ita la iha kabu submarinu, koneksaun internete ne’e delay (neineik) Iha Timor-Leste telemor halo ninia esforsu tomak atu introdús teknolojia 5G hodi halais liña internete, ha’u espera ho kabu submarinu ne’ebé mak governu planu atu dada mai sei halais di’ak liu tan liña internet iha TL, iha tempu hanesan ho teknolojia 5G liña internet sei lais liután,” katak Diretur Jerál Telemor.
Xefe Telemor ne’e hatutan Telemor mós ko’alia ho Prezidente Repúblika kona-ba vizaun estratéjia atu hasa’e kualidade liña Internet no mós planu planu guvernu nian atu dada kabu sub-marinu mai iha Timor-Leste.
“Ami mós ko’alia ho PR kona-ba vizaun no estratejia ba tinan hirak tuir mai, atu hasa’e kualidade liña internete no data internet, ami mós hare’e ona planu governu nian mak sei dada kabu sub-marinu. Entaun telemor mós planu atu introdus teknolojia 5G, no koneksaun Broadband iha TL. Ami mós ko’alia ho PR kona-ba dijitalizasaun ne’ebé mak sai ona hanesan pakote importante ida hosi Telemor iha tinan hirak tuir mai, ne’ebé mak haree liubá E goverment atu aselera prosesu dezenvolvimentu iha TL,” tenik Xefe Telemor.
Nia dehan sira mós ko’alia ho Xefe estadu kona-ba solusaun informasaun Comunikasaun Teknolojia (ICT) iha TL iha tinan 10 nia laran, hanesan Sinema, Mosan no seluk tan, no mós atividade apoiu sosiál hanesan ba labarik sira liuliu iha orfonatu no seluk tan.
Iha enkontru ne’e Prezidente Repúblika mós apresia Telemor nia ezisténsia no mós suporta hodi apoiu tomak aktividade ne’ebé Telemor realiza iha Timor-Leste derante tinan sanulu nia laran.
Prezidente Repúblika hato’o mós nia admirasaun ba governu Vietnam la’ós de’it ba istória ne’ebé nia iha maibé liuliu iha parte evolusaun ekonomika no dezenvolvimentu ne’ebé Vietnam hatudu durante nia ezisténsia, no mós hakarak reforsa Koperasaun di’ak liu tan ho governu Vietnam la’ós de’it iha ambitu dizitalizasaun teknolojika maibé liuliu iha ambitu produsaun agrikola.*Jos
