Vítima Inundasaun Suku Hera Presija Apoia Urjente Hosi Governu

Fahe Tutan

Naunil Media (Díli), Udan bo’ot ne’ebé akontese iha Sexta (13/03) ne’e, hamosu inundasaun bo’ot iha fatin-fatin iha capital Díli, inklui afeta mos ba komunidade umakain 20 no plantasaun balu, iha suku Hera, Postu Adiministrativu Cristo Rei, Munisípiu Díli.

Nune’e vítima hamutuk ho autoridade lokál sira iha suku Hera husu ba governu liu husi Ministériu Obras Públikas (MOP) atu urjentemente fó apoia mákina Excavator hodi ke’e loos rai atu bee mota tuir ninia dalan.   

Xefe Aldeia Hali-Dolar, Clementino Pereira, hatete kuaze komunidade sira nian uma no plantasaun sira iha suku Hera hetan estragus tanba kauza hosi udan bo’ot hamosu inundasaun.

“Akontesementu inundadasaun ne’e, buat hotu la bele salva  udan kuaze oras 9 nian laran, estraga hotu populasaun sira nian uma no plantasaun sira, tanba ne’e ami ejiji ba governu  atu kria bronzon hodi proteje bee, populasaun nian uma,  no plantasaun sira”, xefe aldeia ne’e ejiji.

Nia dehan, kada tinan mota sempre fó hameasa ba kuminidade sira, tanba bronzon laiha nune’e sobu uma populasaun no plantasaun.

“Ami husu ba governu liu hosi Ministériu Obras Públikas (MOP) tenke fó antensaun emerjensia lori Excavator mai para hadi’ak ka suru los mota tuir fali nian dalan”,  nia husu.

Vítima inundasaun, Elidio Soares, hatete laiha tan esperansa moris hanesan babain tanba sira nian sasan hetan estragus total.  

“Ami nia uma estragus hotu, bee tama, ami la salva ami nian sasan iha uma laran. Ho mota ne’ebé boot plantasaun mós la aproveita hotu”, abitante halerik ne’e.

Xefe suku Hera Antoninho M. da Silva, haktuir mota bo’ot hahú sobu husi aldeia Akanunu tama to’o iha aldeia Hali-dolar no Ailok-Laran, afeitadu populasaun sira nian uma hamutuk  umakain 20 totál no umakain 100 mak bee tama.

“Ha’u hakarak hateten de’it, númeru estragus ne’e sei iha númeru provezóriu hela, ami seidauk tama hotu iha aldeia 3 parte husi F-FDTL Naval Hera nian tanba mota bo’ot hela”, hateten xefe suku Hera  Antoninho.

Udan bo’ot durante oras 9 resin, hahu husi tuku 11:30 dader to’o fali kalan tuku 7 otl. Inundasaun ne’e afeta ba  aldeia tolu hanesan Halidolar, Ailok-Laran ho Akanunu iha suku Hera.

Plantasaun ne’ebé hetan estragus hamutuk hektar 4, uma  ne’ebé hetan estragus total hamutuk 20. Ana

Leave a Reply

Your email address will not be published.