Komandu PNTL Munisípiu Díli Intensifika Polísia Tranzitu hodi Kontrola Motorista

Naunil Média(Díli), Komandante Polísia Nasionál Timor-Leste (PNTL) munisípiu Díli, Superintendente Xefi, Henrique da Costa, Informa  hamutuk ho Segundu Komandante Díli, Superintendente  Polísia, Euclides Belo, hala’o enkontru hamutuk ho Komandante Tranzitu Díli ho nia membru sira atu fó orientasaun ida klaru hodi regulariza seguransa rodoviaria no-mós oinsá atu hadi’a di’ak liután servisu iha ekipa ho forma ida efikáz, atu nune’e bele dezempeñu ba asaun sira ho profisional.

“Enkontru ida ohin ne’e ita fokus liu ba seksaun Tranzitu Seguransa Rodoviaria PNTL hodi halo avaliasasaun sira hanesan prezensa polísia nian iha públiku, disiplina uza fardamentu, halo atendementu ho lalais, halo “refreshing training” ba membru tranzitu sira wainhira halo “check point” iha terenu inklui sensibiliza rezolusaun regra Estadu Emerjensia no Serka Sanitária ne’ebé Guvernu dekreta ona hodi implementa”, dehan Euclides Belo,  hafoin remata enkontru ne’e iha Komandu PNTL munisipiu Dili, Caicoli, segunda,   semana ne’e.

Euclides esplika, públiku ohin loron ezize barak tebes ba figura lideransa ida di’ak hodi fó atendementu ba nesesidade ema hotu nian, tanba ne’e nia enkoraja nia membru sira atu mantein disiplina, tenke rona orden husi komandante sira.

“Orientasaun komandu hato’o ba komandante sira no ba membrus tomak katak tenke garante Díli hakmatek ba ema tomak, la bele iha ema ida impede ema seluk nia liberdade, ida ne’e labele akontese, tanba iha ita nia konstituisaun artigu 44 nian garantia ema nia liberdade no seguransa”, katak nia.

Nia dehan,  maibé husu ba membru tomak, tenke mantein disiplina, tenke rona orden komandante sira hodi intensifika halo kontrola ba motorista sira ne’ebé kontra kodigu estrada nian”, dehan Segundu Komandante, Euclides.

Komandante Euclides Belo mós apela ba nia membru sira atu kuida no atensaun didiak iha atendementu loron-loron, no nia husu atu membru sira atualiza informasaun ba malu, liu-liu atu hare fali rezultadu nomos obstaklu sira ne’e ho efetivu. Ana