SEKOMS Konsidera Corona vírus variante Delta tama Timor-Leste La Loos
Naunil Media (Díli) Sekretáriu Estadu ba Komunikasaun Sosiál,(SECOMS Sigla Portugés) Merício Juvinal dos Reis Akara deklara Informasaun ne’ebé publikada husi mídia balun katak Corona vírus variante Delta tama ona iha Timor-Leste, ne’e laloos.
“AKARA” hato’o afirmasaun ne’e hodi hatan ba preokupasaun deputadu sira nian uainhira reprezenta Governu partisipa sesaun plenária segunda-feira, loron 05 fulan-jullu, tinan 2021, iha uma fukun Parlamentu Nasionál.
“SEKOMS iha plenáriu ordináriu hatete nia parte simu ona informasaun husi Ministériu Saúde no Sentru Integradu Jestaun Krize katak informasaun ne’ebé publikada husi mídia impresa ne’e laloos tanba atu identifika variante foun husi Corona vírus tenke liuhosi Genome Sequence Test ne’ebé normalmente haruka ba Melbourne-Austrália no presiza lori tempu semana tolu atu identifika loloos ezisténsia husi variante foun ne’e”, hatete membru governu ne’e.
Merício Juvinal dos Reis “AKARA” afirma informasaun loos no ofisiál kona-ba covid-19 mai husi Ministériu Saúde no Sentru Integradu Jestaun Krize, tanba ne’e mídia sira tenki halo konfirmasaun no tenki iha pensamentu krítika antes publika informasaun ne’ebé iha tendénsia provokativu hodi halo pániku komunidade.
Iha intervensaun ne’e, Sekretáriu Estadu ba Komunikasaun Sosiál mós klarifika informasaun ne’ebé publikada husi mídia balun katak Governu kansela rehabilitasaun estrada ligasaun Laga no Baguia, ne’ebé tuir Nia informasaun ne’e laloos tanba obra ne’e hahu tama ona iha nível Detail Engineer Design/DED no hein tama ba prosesu konkursu públiku.
“Relasiona ho preokupasaun katak pasiente Timoroan iha Indonézia ne’ebé to’o ohin loron seidauk simu subsídiu, Ministériu Saúde informa ona katak orsamentu transfere ona no iha tempu badak sira sei simu”.
Hatan kona-ba kestaun vasinasaun, Ezekutivu ne’e hateten Governu iha ambisaun katak iha finál tinan 2021 ne’e, maioria populasaun iha territóriu Timor-Leste bele hetan ona vasinasaun nune’e bele lori situasaun fila-fali ba normalidade.
Relativamente ho preokupasaun deputadu sira nian kona-ba problema saúde, edukasaun, bee moos , eletrisidade, veteranu no asuntu importante sira seluk, SEKOMS hatete nia parte rejista no sei enkamiña ba ministériu kompetente atu fó solusaun.Dms
