Komjer: Postu Entrada Transforma Sai Seguransa Tranzitu
Naunil Média (Dili), Postu Polísia pontu entrada iha kapitál sei transforma ba postu seguransa tranzitu nune’e membru sira servicu nafatin maibé reduz de’it.
Komandante Geral Polísia Nasionál Timor-Leste (PNTL), Komisariu Faustino da Costa hato’o lia hirak ne’e ba Jornalista hafoin remata enkontru ho Prezidente Repúblika (PR) Francisco Guterres “Lú-Olo” iha palásiu Prezidente Nicolau Lobato Bairru Pite, Kinta, (07/10)
“Entaun ami transforma postu entrada iha kapitál sai postu seguransa tranzitu para membru sira servicu nafatin, hanesan ohin ita lahatene pandemia ida ne’e nia tun ona tun ba beibeik ona too laiha ona ka lae agora se tempu ruma mak kazu ne’e iha fila fali bainhira mak ita mobiliza fali para ba instala fali fatin sira ne’e para membru sira halo servisu Ne’ebé ami sei reduz membru ne’ebé hala’o servicu iha postu sira ne’e”, dehan Komisariu Faustino da Costa
Konjer hatutan keta haluha katak situasaun agora ne’e laiha ona serka sanitaria, laiha konfinamentu obrigatoriu domisiliariu, mas estadu emerjensia la’o nafatin
Faustino hateten se retira tiha membru Polísia sira ne’ebé hala’o servicu iha postu entrada entaun lagarante ona fasilidade sira ne’ebé durante ne’e kria ona.
“Agora teknikamente atu dehan hanesan ne’e sé Ita retira tiha membru sira husi postu ne’e oinsá ita garante katak fatin sira ita kria hela ne’e seguru keta halo ohin ita hasai membru sira husi fatin ne’ebá aban ne’e lona sira ne’e kuak hotu haris fatin sira laiha fatin”, tenik Faustino
Líder PNTL ne’e mós aprezenta no aktualiza atendementu polísia ba kazu atravez ilegais sira ne’ebé iha semana balun no preparasaun Polísia nian liu-liu ba eleisaun sira.
Iha enkontru Chefe Estadu mós fo nia lia menon rua ba komandante Geral ida mak ba kontinuasaun prosesu ba atravesas ilegais sira ne’e no sengundu mak kontinua hala’o servicu tanba agora nafatin iha estadu emerjensia.
Antes ne’e mós Primeiru Ministru Taur Matan Ruak hateten retira postu seguransa iha pontu entrada ne’e komandu sei haree, no se laiha ona nesesidade entaun bele retira maibé seidauk iha desizaun.*Jos
