Komunidade Lautém Hato’o Asuntu Veteranus Ba PR “Lú-Olo”
Naunil Média (Dili), Representante Komunidade Munisípiu Lautém hato’o asuntus Verifikasaun dadus veteranus nian ba Prezidente da Republika (PR).
“Asuntus importante balun ne’ebé durante ne’e ami observa iha Munisípiu Lautém, liu-liu asuntu veteranus nian ne’ebé oras ne’e dadaun halo Verifikasaun iha ami nia Munisípiu”, Dehan porta voz komunidade Lautem, Tomas Mariano Pinto, ba jornalista sira, bainhira remata hasoru malu ho PR iha, Palasiu Prezidente, Segunda, (18/10)
Nia hatete, tuir Lei númeru 3/2006 no Konstituisaun Repúblika Demokrátika Timor-Leste (K-RDTL), define kona-ba Pensaun martires no oan kiak sira.
“Lei númeru 3/2006, artigu 11 K-RDTL define liu-liu kona-ba Pensaun ba martires sira, oan kiak sira ne’ebé atu simu direitu ba pensaun inan aman nian, katak ema inan ka aman nia oan simu de’it nia ka nia aman”, haktuir Porta voz ne’e.
Tomas esplika, inan ne’ebé simu ona nia aman nia direitu entaun nia inan ne’e laiha direitu ona, tanba ne’e mak sira hakarak mai hato’o ba PR, atu nune’e bele hato’o tutan ba Ministeriu kompotente kona-ba asuntu ne’e.
Nia mos afirma kona-ba menoridade ne’ebé hola parte iha frente klandestina nian ne’ebé mós dalaruma lakonsidera tanba ne’e mos sira hato’o ba PR.
” Verifikasaun dadus veteranus ne’e ema menoridade mós Iha duni, maibé seidauk identifika loloos tanba Lei define, maibé karik iha akontesementu ruma depois sira halo reklamasaun ka oinsá, depois mak halo ida ne’e,” Nia haktuir
Iha enkontru ne’e PT mós enkoraza nafatin no sei hato’o sira nia situasaun ne’e ba Ministeriu Kombatentes Libertasaun Nasionál atu nune’e proteze Lei ida ne’ebé define hodi dignifika sira ne’ebé mate nu’udar martires ba libertasaun nasionál.
Antes ne’e mós Sekretariu Estadu Asuntu Kombatentes Libertasaun Nasionál Gil da Costa Monteiro “Oan-Soro” hateten kona-ba prosesu Verifikasaun dadus veteranus nian dadaun ne’e la’o hela, Oe-kussi mak hotu tiha ona no Munisípiu sira seluk ne’e seidauk tanba servisu hahu husi fulan Agostu to’o agora. *Jos
