PM: Taur Kontente Ho Obra Igreja Bekora Kualidade
Naunil Media (Díli), Primeiru Ministru (PM) Taur Matan Ruak hateten, ha’u kontente tebes ho obra igreja Bekora ho kualidade.
“Ha’u kontente loos ho Igreja ida ne’e, tanba ne’e ho ninia konstrusaun kualidade di’ak tebes tanba ne’e, mak ha’u hakarak em nome de Governu agradese amu Pároku no amu Eis Pároku ba supervizaun, ba Sr. Joaquim (eis Kordenadór GASC) ne’ebé uluk ajuda maka’as iha ne’e”, Dehan PM Taur Matan Ruak ba jornalista sira iha inaugurasaun Igreja Becora, Domingo,(21/11).
Xefí Governu dehan, Konstrusaun Igreja ne’e hetan apoiu fundu hosi Governu liuhosi Gabinete Apoiu Sosiedade Sivíl inklui kontribuisaun Arke Disoseze Metroplitanu Díli no sarani Bekora rasik.
“Ho nune’e agradese ba parte hotu ne’ebé involve iha konstrusaun refere dezde hahú to’o remata no husu atu tau atensaun ba manutensaun nian”, Katak nia.
Eis Prezidente ne’e hateten estadu ho igreja parseria husi funu tó ukun an.
“Parseria Igreja ho Estadu/Governu ne’e tempu naruk ida la’ós de’it iha tempu luta ba ukun an, mas depois de restaurasaun independénsia, ké parseria ida ne’e obriga fó dalan ba Estadu no Governu intervein diretamente iha atividade rua, ida parte infraestruturas ida seluk iha parte sosiál”, Tenik nia.
Igreja refere konstrui hahú iha tinan 2015, ho Fundu hosi Gabinete Apoiu Sosiedade Sivíl millaun 1.7, hosi Dioseze rihun 300 no kontribuisaun hosi sarani no ema laran luak balu, hodi ikus mai finaliza obra refere. Ana
