Lú Olo: Tinan Kotuk Husu LAT Kandidatu PR, Sai Husi Militár

Fahe Tutan

Naunil Media (Díli), Prezidente Repúblika (PR)  Francisco Guterres “Lú Olo” hateten, Iha tinan kotuk kedas hato’o ba Eis General Lere Anan Timur (LAT) katak hakarak atu kandidatu a’an ba Prezidente Repúblika sai husi militár.

Prezidente Repúblika Francisco Guterres “Lú Olo” hato’o lia hirak ne’e ba jornalista sira iha Salaun Luz Clarita, Segunda, (28/02).

“Agora ha’u hakarak mós hateten ba ita bo’ot sira katak iha tinan kotuk liu, ha’u hateten mós ba Eis General Lere Anan Timur para nia hakarak atu kandidatu sai tiha kedas husi militár, iha ne’ebá kedas para nune’e ita bele ko’alia ho partidu A ka partidu B ou partidu C, para atu kandidatu nia bá Prezidente Repúblika so ke maun Lere lahalo ida ne’e to’o dekreta tiha ona kalendariu ba eleisaun ninian mak nia foin mai atu kandidatu fali”, dehan “Lú Olo”.

“Lú Olo” hatutan, Presiza haree tempu no nia mós dehan ba LAT katak ema husi partidu polítiku husu Lere atu sai husi instituisaun militár ba kandidata a’an ba Prezidente Repúblika, maibé sira tauk tanba kuandu lakon sé mak responsabiliza.

“Entaun ita presiza haree tempu no ha’u mós hateten ba nia dehan katak agora ema Partidu Polítiku sira, ha’u Prezidente Repúblika prontu ha’u lahalo servisu partidu nian,  maibé ha’u hanoin ema Partidu Polítiku husu fali General Lere sai husi instituisaun military,  para atu sai kandidatu sira mós tauk, tauk tanba ba mak lakon sé mak responsabiliza ha’u hateten hotu ida ne’e ba sira ne’ebé desizaun iha ita bo’ot nian rasik”, katak “Lú Olo”.

Aktual Prezidente Repúblika ne’e mós hateten, General Lere Anan Timur nian Kandidatura ne’e direitu ninian,  atu bele kandidatu ne’e direitu polítika ema ida-idak ninian,  tanba ne’e mak sira hotu ba kompete ba Prezidente Repúblika depois mak haree se entre Lere Anan Timur no “Lú Olo” mak manán ka ou sira seluk mak manán ne’e ba kampaña no eleisaun mak bele haree.

Nia dehan,  Atu sai Prezidente Repúblika ne’e la’ós oportunidade maibé Konstituisaun RDTL hateten rasik katak Prezidente Repúblika nia mandatu tinan lima (5),  antes atu hakotu nia bele Re-kandidatu nian a’an para atu ba mandatu ida tan kumpri de’it Konstituisaun hateten,  no laiha komprimisiu ida dehan katak ida tun bele fó fatin ba ida seluk para depois tama fali nia fatin ne’e laiha. *Jos

Leave a Reply

Your email address will not be published.