Adjunta PJR: Kazu Kalbuady MP Haruka Ona Prosesu ba Tribunal
Naunil Media (Diíli), Adjunta Prokuradora Jerál (PJR), Remizia de Fatima hateten, Kazu Francisco Kalbuady Lay parte Ministeriu Públiku (MP), notifika ona no haruka ona ba iha Tribunal, hodi hein ba dezignasaun julgamentu.
Adjunta Prokuradora Jerál Remizia de Fatima hato’o lia hirak ne’e ba jornalista sira hafoin enkontru ho Prezidente Repúblika (PR) Francisco Guterres “Lú Olo” iha Palásiu Prezidensiál Nicolau Lobato Bairru Pite, segunda (28/03).
“Kazu korupsaun sira ne’ebé akontese halo hela prosesu investigasaun (Gabinete Sentral Combate Corrupção) (GSCC) nian, no informa mós kona-ba kazu Kalbuady nian ne’ebé mak agora fila mai Timor no ami notifika ona prosesu agora haruka ona ba iha Tribunal, hodi dezignasaun ba julgamentu ninian”, dehan Adjunta Prokuradora Jerál Remizia de Fatima.
Adjunta PJR ne’e hatutan, Kona-bá kazu saida mak Kalbuady komete ne’e so bele rona husi Tribunal, tanba prosesu hotu ministeriu públiku haruka ona ba tribunal, tanba antes ne’e MP preparadu ona akuzasaun ho nune’e hein de’it desizaun saida de’it mak Tribunal sei deside.
“Kona-ba kazu saida mak nia komete ha’u hanoin orsida mak ita rona husi tribunal tanba prosesu ne’e ami promete ba Tribunal wainhira nia fila mai ami notifika nia iha loron ne’eba depois ami remete kedas ba iha tribunal tanba akuzasaun preparadu tiha ona tanba nia bá iha li’ur no nia foin fila mak ami notifika ami haruka tiha ona ba iha tribunal entaun ita hein de’it desizaun Tribunal nian wainhira mak atu deside” , katak Adjunta PJR
Nia dehan, Prezidente Repúblika mós fó hanoin kona-bá kazu ne’e, katak prosesu hotu entrega ba iha Tribunal bainhira julgamentu mak haree katak sala tenke asumi responsabiliza se karik lasala mós konforme deside tuir lei.
Ha’u hanoin hanesan baibain ida ne’e prosesu ida ne’e e mak la’o no entrega ba iha Tribunal, no depois wainhira julgamentu mak ita haree dehan katak se karik nia sala tenke asumi responsabilidade ne’ebé mak nia iha, se karik nia lasala entaun konforme deside tuir lei ha’u hanoin ida ne’e mak Prezidente Repúblika fó hanoin, nia hakotu. *Jos
