José Belo : CNE Presiza Atensaun Husi PR-PN
Naunil Media (Díli), Prezidente Komisaun Nasional Eleisoens (CNE-Sigla Português), José Agostinho da Costa Belo, hateten orgaun eleitoral hanesan CNE presiza atensaun husi Prezidente Repúblika (PR), no Parlamentu Nasionál (PN).
Lia hirak ne’e hato’o husi Prezidente CNE ba Jornalista sira hafoin remata enkontru ho Prezidente Repúblika (PR) José Manuel Ramos Horta iha palásiu Prezidensiál Nicolau Lobato Bairru Pite, Segunda (27/06).
“Difikuldade no obstaklu sira ne’ebé iha, saida mak CNE rezista presiza mós atensaun husi Prezidente Repúblika hanesan mós husi Parlamentu Nasionál atu nune’e para eleisaun sira mai ne’e ita prepara ho di’ak liuliu ligadu ho ita nia sidadaun sira no eleitor sira iha rai li’ur sira ne’ebé hotu-hotu hanoin katak sira tenke fo sira nia votu, tanba ita nia eleisaun ou votasaun la’ós obrigatoriu tanba ne’e aprosima no fasilita sira atu nune’e sira bele ezerse sira nia votu ho di’ak,” dehan Prezidente CNE
Prezidente CNE hatutan Comissão Nasional Eleições hetan konvite husi Prezidente Repúblika nune’e fó mós hanoin ruma liu-liu kona-ba eleisaun sira ne’ebé liu ona no preparasaun ba eleisaun parlamentár ne’ebé mai.
José Belo esplika Comissão Nasional Eleições hato’o mós kona-ba foin lalais delegasaun husi CNE vizita ba Angola tanba sai mós membru orgaun eleitoral iha nivel Comunidade Países da Língua Portuguesa (CPLP) no CNE hola parte hanesan membru permanente.
“Diskuti mós kona-ba pontus-pontus liuliu avanzu sira i liuliu eleisaun ne’ebé foin lalais ita halo nivel CPLP sira kongratula Timor oan eleisaun ne’ebé la’o di’ak, esperiénsia sira ne’ebé ita iha, iha pontus balun ne’ebé ita mós bele sheare ho sira liuliu kona-ba eleisaun exterior,” katak José Belo
Nia dehan eleisaun ka votasaun antisipada ne’ebé sira husi Angola, Portugál ho Cabo-Verde halo ne’e iha posibilidade Timor oan mós bele adopta buat balun ne’ebé di’ak ba Timor-Leste, intermus lejislasaun TL buka atu hadia bei-beik saida mak bele halo, halo di’ak kualidade eleisaun iha tinan oin.
Iha enkontru ne’e Prezidente Repúblika mós enkoraja nafatin CNE no STAE para atu Servicu ho di’ak karik eleisaun liu ba iha problema no kestaun ruma ne’ebé lakontribui ba eleisaun ho kualidade presiza hadia no Xefe estadu mós disponivel ko’alia ho CNE nune’e iha hanoin ruma hamutuk atu diskuti hodi buka solusaun no lejislasaun mós bele kobre assuntu ne’ebé seidauk di’ak.*Jos
