PR Ramos Vizita Iha Indonézia Sei Ko’alia Kona-Bá Adezaun TL Ba ASEAN
Naunil Media (Díli), Vizita Prezidente Repúblika (PR) José Manuel Ramos Horta nian iha Indonézia sei ko’alia mós kona-ba adezaun Timor-Leste (TL) ba iha Association of Southeast Asian Nations (ASEAN) tanba Xefe estadu sei hasoru malu Sekretariu Jerál Asean nian iha Jakarta.
Lia hirak ne’e hato’o husi Embaixador Indonézia iha Timor-Leste Okto Darinus Manik ba jornalista sira hafoin ho ekipa remata enkontru ho Xefe estadu iha palásiu Prezidensiál Nicolau Lobato Bairru Pite, kinta (07/07).
“Vizita ba Indonézia ne’e mós sei ko’alia kona-ba adezaun Timor Leste nian ba Azean tanba ne’e Xefe Estadu sei hasoru mós Sekretáriu Jerál Azean iha Jakarta atu bele haree servisu hamutuk sira iha setór ekonómia komérsiu no ita sei esplora tan setór seluk bainhira iha ona sorumutu Jakarta Indonézia,” dehan Embaixador RI.
Diplomata RI ne’e hatutan sorumutu ho Prezidente Repúblika ne’e ko’alia liu kona-ba preparativu sira vizita Xefe Estadu nian ba Indonézia, ida ne’e hanesan faze dahuluk tanba, ko’alia liu kona-ba saida mak bele halo atu fasilita viazen Xefe Estadu nian, maibé sei hein evolusaun ajenda sira tuir mai.
Tanba ne’e enkontru preparativu ida ne’e haree liu kona-ba parte tékniku sira relasaun ho vizita Jakarta no laiha preparativu espesiál ne’ebé halo iha ne’e, tanba bainhira to’o iha Indonézia sei hasoru malu ho sé se.
“Ita mós hahú haree ajenda Xefe Estadu nian, bainhira to’o iha Indonézia sei hasoru malu ho se-se, maske nune’e ita seidauk bele anunsia ajenda serteja Xefe Estadu nian bainhira to’o iha Indonézia tanba buat hotu seidauk fiksu no ida ne’e nu’udar ajenda ne’ebé ekipa hanoin hela no deseju sei susesu atu bele hasa’e intensidade relasaun Indonézia no Timor Leste,” katak Diplomata RI
Nia dehan, Karik iha mudansa ba ajenda ruma sei husu atu halo tan sorumutu ho Xefe Estadu hodi atualiza situasaun sira tuir dinámika ne’ebé iha, tanba vizita ba Indonézia ne’e nu’udar komitmentu Xefe Estadu nian ba komprimisiu ne’ebé sei halo bainhira eleitu ba Xefe Estadu.*Jos
