Embaixador UE Andrew: TL Parseiru Importante Ba UE Iha Sudeste Aziatiku
Naunil Media (Díli), Embaixador Uniaun Europeia Andrew Jacobs hateten Timor-Leste (TL) Parseiru Importante ba Uniaun Europeia iha sudeste Aziatiku, tanba servicu aumenta no influénsia iha reziaun ne’e.
“Timor-Leste hanesan Parseiru ida ne’ebé importante tebes ba Uniaun Europeia iha sudeste Aziatiku, tanba ita servisu atu aumenta ita nia prezensa no influénsia iha reziaun ida ne’e, durante ha’u nia tempu iha Timor-Leste Uniaun Europeia mós hametin ona ninia kooperasaun dezenvolvimentu nian ho Timor-Leste”, dehan Embaixador UE ba jornalista sira bainhira halo despedida ho Prezidente Repúblika (PR) José Manuel Ramos Horta iha palásiu Prezidensiál Nicolau Lobato Bairru Pite, kinta (07/07).
Embaixador ne’e hatutan, Sira kontinua fornese apoiu liu husi orsamentu direitu no servisu besik liu guvernu no sosiedade sivil iha área nutrisaun, agro florestal, mudansa klimatika, jestaun finanseiru públika, no desentralizasaun.
“Ita oras ne’e servisu hela iha programa foun ida ne’ebé haree liu ba diversifikasaun ekonómika, dezenvolvimentu setór privadu no formasaun professional, ami mós apoiu Timor-Leste nia preparasaun tékniku ba adezaun Asean”, katak Embaixador.
Andrew Jacobs esplika, Nu’udar previleiju ida atu haree prosesu demokrátiku ne’ebé funsiona ho di’ak iha Timor-Leste, durante eleisaun prezidensiál nia mós haksolok tebes bele hola parte iha misaun observasaun eleitoral Uniaun Europeia nian, no sai sasin ba demokrasia iha nasaun Timor-Leste.
Antes husik hela Timor-Leste Diplomata husi Uniaun Europeia ne’e mós sente triste tebes husik Timor-Leste liu tiha tinan tolu (3), no nia mós hadomi tebes nasaun furak ida ne’e no nia sei la haluha Timor oan sira, tanba durante hela iha TL haksolok nune’e mós Timor-Leste no Uniaun Europeia sai ona parseiru ne’ebé besik no metin liu, no mós fahe valor save sira hanesan demokrasia, Direitus Umanus no multilaterizmu.*Jos
