FEATUREDGeralIkus LiuNews

Komunidade Kaipelara Liquiçá Inisiativa Loke Rasik Estrada Foun

Fahe Tutan

Naunil Media (Díli), Komunidade Aldeia Vatumori, Suku Gugleur Postu Administrativu Maubara, Munisípiu Liquiçá, iha inisiativa rasik hodi loke (ke’e) Estrada foun atu fasilita sira (komunidade) lori produtu ba fa’an iha merkadu, bele asesu ba albulansia wainhira situasaun emerjénsia evakua pasiente ba fasilidade saúde no nesesidade seluk tan.

Inisiativa loke Estrada foun ne’e, komunidade kompostu hosi joven feto-mane ho inan-aman sira husi aldeia refere, sira ke’e Estrada ho de’it ai-suak, enxada no material seluk ne’ebe tenke uza fíziku mak barak-liu.   

Komunidade sira ke’e Estrada foun ne’e kilometru rua (2) husi bairu Kaipelara liga ba aldeia Vatumori, Suku Gugleur.    

“Durante ne’e ami la asesu estrada mai ami iha bairu Kaipelara aldeia Vatumori, ho inisiativa ida ne’e, ami organiza malu feto no mane hamutuk hodi kee dalan uza material manual hodi ke’e dalan”, Lian-Na’in Aldeia Vatumori, Silvano Asunção, ba jornalista Naunil Media iha Bairu Kaipelara, Sábadu (17/10).

Lia-na’in ne’e, hateten inisiativa ne’e la hetan apoia ruma husi autorisade, tantu aldeia, suku no postu, maske komunidade ke’e dalan foun ne’e durante semana rua.

“Bairu Kaipelara iha aldeia Vatumori, tinan barak ona la iha dalan, difikulta tebes ba ami nia moris, tanba atu asesu produtu iha merkadu maibé estrada laiha. Ami ke’e dadaun ne’e motor mak bele liu, kareta labele liu, tanba dalan klot”, tenik Lia-na’in Silvano.

Alixo Sanches Libelino, hateten mesmu dalan ne’e kona los ba nia plantaun kefé, maibé oferese gratuitamente, tanba mesak maun alin iha uma lisan ida.

Flaviano do Rozario Sanches, hateten nu’udar juventude iha bairu Kaipelara hamrik hamutuk ho inan-aman sira hodi ke’e dalan, tanba durante ne’e la-asesu dalan.

“Husu nafatin ba na’i-ulun sira bele tau matan ba komunidade ida ne’e nia halerik tanba la iha dalan. Eletrisidade laiha, komunidade uza de’it painel solar hodi bele hetan naroman iha tempu kalan, maibé tempu udan labele hetan naroman”, dehan reprezentante juventude iha aldeia ne’e.

Total uma kain iha aldeia Vatumori 142 no populasaun 689. Res

Leave a Reply

Your email address will not be published. Required fields are marked *