Traballador Timoroan 109 Sei Aranka Ba Korea, Na’in 9 Kansela Tanba-Saúde
Naunil Media (Díli), Diretór Nasionál Empregu no Exterior (DNEE) Filomeno Soares hateten, traballador Timoroan hamutuk 109 mak sei aranka ba servisu iha Korea do súl iha dia 20 fulan Novembru tinan ne’e, maibé nain 9 mak kansela tanba failansu husi medikal.
“Ita halo seremonia ba loron ohin totál hamutuk 100, tuir lolos sira iha 109, maibé tanba iha nain 9 mak failla medikal, entaun sira nain 9 la konsege aranka iha tempu ida ne’e, ne’ebé agora dadauk ita prepara traballador atu aranka iha fulan ida ne’e hamutuk nain 100”. dehan Diretór DNEE ba jornalista iha salaun Timor Lodge Comoro, konta (17/11).
Nia hatutan, Traballador na’in 9 ne’ebé mak kansela ba servisu iha Korea do súl iha dia 20 ne’e la’ós signifika katak sira kansela totál, maibé bainhira trabllador hirak ne’e trata sira nia saúde di’ak tiha ona bele ba fali.
Enkuantu trabllador hirak ne’e atu aranka ba servisu iha Korea ne’e sei fahe ba grupu rua hanesan, grupu ida aranka iha dia 20 no grupu ida sei aranka iha dia 27.
“Preparasaun ida ne’e ita konsege mobiliza trabllador ho númeru ne’ebé mak bo’ot, no fulan Dezembru mós ita mobiliza tan bele mós to’o kuaze atus rua”, Nia salienta
Entretantu totál trabllador ne’ebé mak tama ona iha Korea do súl, hahú husi tinan 2009 too agora hamutuk rihun lima resin neen (5.006) mak tama ona Korea.
Nune’e mós traballador ne’ebé mak agora sei eziste iha Korea, inklui mós ho alin sira ne’ebé mak atu aranka iha dia 20 ne’e hamutuk ema nain 3948, no husi totál ida ne’e kompostu husi feto hamutuk nain 85 mak iha ona Korea no mane hamutuk nain 3948 mak agora dadauk sei eziste iha Korea. LTS/Gyor
