Dom Virgílio : Graduandu Tenke Kumpri no Sai Manorin Di’ak
Naunil Media (Díli), Kinta (7/09) ne’e, Instritutu Siénsia Relijioza (ICR-Sigla Portugés) nia-estudante finalista hamutuk 41 ne’ebe transfere ba Universidade Katolika Timorense (UCT-Sigla Portugés), remata ona sira nian estudu (simu graduasaun).
Iha seremonia graduasaun, Arsebispu Arkidioseze Metropolitanu Díli, Dom Virgílio Kardeal do Carmo da Silva, husu ba graduandu sira atu kumpri promesa sai manorin di’ak iha area ne’ebe esduta ona.
“Imi simu ona misaun ida liu husi kruz no biblia, labele ba rai de’it maibe tenke tau iha prátika. Imi bele sai professor ida di’ak no no iha responsabilidade lori jerasaun foun ne’ebe hatene hadomi no matenek”, Dom Virgílio hato’o liu husi iha seremonia graduasaun mahala’o iha kampus UCT, Balide.
Saserdote ne’e hatutan, graduandu sira tenke banati tuir vida manorin no tenke infrenta dezefiu no labele halai ba buka servisu iha organizasaun naun governamental sira.
“Liu husi festa natividade vijen santísima, hakarak dedika ba graduandu hotu-hotu atu nain feto proteje nafatin imi nia futuru, akompanha imi no tulun imi di’ak ba timoroan hotu”, dehan Dom Virgílio.
Reitor UCT, Padre Joel Casimiro Pinto, informa estudante graduandu 41 ne’e kompostu husi 31 husi departamentu professor relijiaun no moral no 10 seluk departamentu servisu social.
Iha fatin hanesan, Ministro Ensinu Superior Siensia no Kultura, Honorio da Costa Pereira Jeronimo, konsidera edukasaun hola papel importante ho nia fundamentu iha sosiedade no liu husi Igreja Katólika moshola papel ida ne’e ba kontribuisaun dezenvolvementu Nasaun.
“Hau sei fo apoio ba UCT karik professores sira balun hakarak masteradu no dotoramentu, sei rekruta matenek nain sira husi UCT atu tama ba servisu para bele fo apoio ita nia ensino superior sira nia servisu no sei apoio mos UCT”. Hateten Governante ne’e liu husi nia-diskursu iha UCT, Balide. Mj2
