Lere Kongratula Xanana, Taur Bele Komanda Militár Iha Situasaun Difisil

Naunil Media (Díli), Eis Xefí Estadu Maior Generál das Falintil Forsa Defeza Timor-Leste (F-FDTL) Tenente General Lere Anan Timur,  Fó parabens ba  Kay Rala Xanana Gusmão no Taur Matan Ruak, ne’ebé bele Komanda militár iha situasaun difisil.

Eis Tenente General Lere Anan Timur hato’o lia hirak ne’e liu husi diskursu bainhira komemora Aniversariu Falintil Forsa Defeza Timor-Leste ba dala 21, ne’ebé selebra iha Qurtel General Fatuhada, Kuarta, (02/02).

“Parabéns ba maun bo’ot Xanana, Parabéns ba maun bo’ot Taur Matan Ruak imi bele komanda imi nia militár sira iha situasaun difisil bele lori uituan mai vila hasae Bandeira Independensia ho nia povu no ohin loron Nakfilak aan ba Forsa Defeza Timor-Leste”,  dehan Eis Tenente General Lere.  

Eis Tenente General ne’e mós agradese ba Prezidenti Repúblika (PR) Francisco Guterres “Lú Olo” no Primeiru Ministru Taur Matan Ruak ho fuan no vontade bele aseita ona rekerimentu ezonerasaun husi LAT,  tanba nu’udar Xefí estadu Maior Jeneral Forsa Armada durante tinan sanulu resin ona.

“Ha’u nia agradesementu ba irmaun kompañeru “Lú Olo” ohin loron nu’udar Prezidenti Repúblika, ha’u nia agradesementu ba ha’u nia irmaun no kompañeru Taur Matan Ruak,  ohin loron Primeiru Ministru, ho imi nia vontade fuan bo’ot no komprensaun tomak aseita ha’u nia rekerimentu ezonerasaun ba ha’u nia knaar nu’udar Xefe estadu Maior Jeneral Forsa Armada durante tinan sanulu resin”, katak Eis Tenente General Lere.

Lere mós agradese ba Ministru Defeza (MD) Brigaderu Jeneral Reformadu Filomino de Jesus Paixão ne’ebé bele rekere nia reforma ne’ebé Promulga iha loron 28 Janeiru 2022. *Jos