PR “Lú Olo”: TL Presiza Instrumentu Harii Estadu Direitu Demokrátiku

Naunil Media (Díli), Prezidente Repúblika (PR) Francisco Guterres “Lú Olo” hateten , Timor-Leste (TL) presiza instrumentu hodi harii estadu direitu Demokrátiku ho vizaun konseptual ba komponente militár seguransa nasionál nian.

Xefe estadu hato’o lia hirak ne’e liu husi diskursu bainhira fó posse ba Vise Xefe Estadu Maiór Jenerál Forsas Armadas no Xefe Estadu-Maiór Forsas Armadas ne’ebé hala’o iha palásiu Prezidensiál Nicolau Lobato Bairru Pite, Tersa (15/02).

“Ohin loron Timor-Leste iha ona instrumentu sira-ne’ebé presiza hodi harii Estadu Direitu no Demokrátiku, mak hanesan vizaun konseptuál kona-bá komponente militár seguransa nasionál ninian, ninia integrasaun iha ordenamentu polítiku no jurídiku, no vontade polítika no institusionál” , dehan xefe estadu  “Lú Olo”

“Lú Olo” hatutan,  Nu’udar Xefe Estadu no Komandante Supremu Forsas Armadas,  sempre haka’as an atu tane aas Forsa Armada sira nia naran kmanek,  no defende sira-nia dignifikasaun tanba konsidera nu’udar importante tebes,  hodi hametin koezaun no unidade Estadu nian no haforsa identidade Timoroan.

PR mós fiar katak Forsas Armadas kaer metin prinsípius no valores étiku, patriótiku no institusionál ne’ebé mak Instituisaun Militár nian rasik, atu nune’e bele serbí nafatin ho di’ak ba kauza moris-di’ak no progresu, liberdade no solidariedade Timor-Leste nian.

Aman ba nasaun ne’e mós tau konfiansa ba Forsas Armadas ho sira nia ierarkia, konfiansa ba sira-nia patriotizmu no dedikasaun tomak ba TL, konfiansa ba sira nia knaar nu’udar Instituisaun importante tebes PR konfiansa ba kapasidade profisionál ne’ebé sira hatudu beibeik ona,  no konfiansa ba sira nia espíritu reformista no sira nia konxiénsia kona-bá saida mak modernidade ezije ba sira. *Jos